Германия ҳукумати Полша, Чехия, Австрия ва Швейтсария билан қуруқликдаги чегараларда паспорт назоратини 2024 йил декабридан кейин узайтиришни режалаштирмоқда. Бу ҳақда Германия Ички ишлар вазирлиги расмий вакили Максимилиан Берлиндаги ДВ мухбирининг саволига жавобан айтиб ўтди.
Унинг сўзларига кўра, Германия ички ишлар вазири Ненси Фезер аллақачон, жумладан, яқинда Гёрлитс шаҳридаги Полша-Германия чегарасига ташрифи чоғида Германиянинг ташқи чегараларида назоратни сақлаб қолиш зарурлигини аниқ айтган.
Ички ишлар вазирлиги вакилига кўра, Германия полицияси ноқонуний миграция олдини олишда катта муваффақиятларга эришди. Хусусан, 2023 йил октябрь ойидан буён Германиянинг ташқи чегараларида ноқонуний миграция билан боғлиқ жиноятларга шерикликда гумон қилинган 1350 га яқин шахс қўлга олинди.
«Умумий Европа бошпана тақдим этишга асосланадиган сезиларли даражада мустаҳкамланган умумий Европа ташқи чегарани ҳимоя қилиш тизими жорий этилмагунча, бу чегара назорати зарур бўлиб қолиши мумкин», деди Ички ишлар вазирлиги вакили.
Бироқ у Шенген келишувида иштирок этувчи бошқа давлатлар (Франция, Бельгия, Нидерландия, Люксембург ва Дания) билан чегараларда паспорт назорати жорий қилинадими, деган саволга жавоб бермади. Ички ишлар вазирлиги мавжуд вазиятга қараб қарор қабул қилади, дея қўшимча қилди Максимилиан Кал.
Германия барча қуруқликдаги чегараларини назорат қилиш Европа чемпионати пайтида жорий этилган
Германия футбол бўйича Европа чемпионатига мезбонлик қилган 7 июндан 19 июлга қадар унинг чегараларининг бутун периметри бўйлаб паспорт назорати жорий қилинган эди. Ўшанда турнирнинг дастлабки икки ҳафтасида чегарада қидирувда бўлган 600 га яқин шахс, шунингдек, ўнлаб футбол безорилари ва ноқонуний миграция билан боғлиқ бўлган бир юз эллик киши қўлга олинган.
Июль ойи ўрталарида Германия Ички ишлар вазирлиги вакили Корнелиус Функе Дания, Нидерландия, Бельгия, Люксембург ва Франция билан чегараларда чегара назорати бекор қилинишини, бироқ Полша, Чехия, Швейтсария ва Австрия билан сақланиб қолишини билдирди.
