АҚШ фуқароси Юанжун Танг Хитой Давлат Хавфсизлик вазирлигида ишлаш учун тил бириктириш ва Федерал қидирув бюросига ёлғон баёнотлар берганликда айбланган. АҚШ Адлия вазирлиги маълумотларига кўра, у илгари Хитой фуқаролигига эга бўлган, аммо Хитойда у мамлакатнинг бир партиявий тизимига қарши чиққан диссидентлик фаолияти учун қамалган.

Департаментнинг аниқлик киритишича, тахминан 2002 йилда Танг Тайванга қочиб кетган ва кейинчалик у АҚШдан сиёсий бошпана олган.

Қайд этилишича, ўшандан бери 67 ёшли Юанжун Танг Нью-Йоркда истиқомат қилиб, у ерда ҳибсга олинган. Америка департаментига кўра, у бошқа хитойлик диссидентлар билан мунтазам равишда тадбирларда қатнашган ва Хитойда демократияни ривожлантиришга бағишланган нотижорат ташкилотга раҳбарлик қилган.

“Юанжун Танг камида 2018 йилдан 2023 йилнинг июнигача АҚШда Хитой Халқ Республикаси агенти сифатида фаолият юритиб, Хитой Давлат хавфсизлик вазирлиги буйруғи билан топшириқларни бажарган. У мунтазам равишда Давлат хавфсизлик департаменти ходимидан кўрсатма олиб, унга ХХР фикрича, Хитой манфаатларига зарар етказиши мумкин бўлган шахслар ва гуруҳлар ҳақида хабарлар юборган”, — дейилади АҚШ Адлия вазирлиги сайтидаги ҳужжатда.

Департамент маълумотларига кўра, Юанжун Танг Хитой Давлат хавфсизлик вазирлиги ходимлари билан бир неча бор учрашган ва уларга хитойлик диссидентлар учун гуруҳ суҳбатига киришга ёрдам берган. Аниқлик киритилишича, ҳуқуқ-тартибот идоралари ходимлари Тангдан Хитой департаментидан олинган кўрсатмалар, шунингдек, унинг Хитой вазирлигидан тўплаган фотосуратлари, видеолари ва ҳужжатларини олиб қўйишган.