Британия ҳукумати шу ҳафтада Европа Иттифоқига Россиянинг “соя флоти” устидан назоратни кучайтириш учун мурожаат қилмоқчи, деб хабар бермоқда Bloomberg манбаларга таяниб.

Бу масала 18 июль куни Буюк Британия бош вазири Кей Стармер мезбонлик қиладиган Европа сиёсий ҳамжамиятининг йиғилиши доирасида муҳокама қилиниши режалаштирилган. Россия Федерацияси санкцияларни четлаб ўтиш учун «соя флоти» нинг нефть танкерларидан фойдаланади. 

Агентлик кўриб чиққан якуний баёнот лойиҳасига кўра, бир қатор Европа давлатлари “соя флоти”га қарши чораларни қўллаб-қувватлайди. Улар Россия нефти билан танкерлар ҳақида маълумот алмашиш ва ҳаракатларни мувофиқлаштиришга қаратилган. 

Буюк Британия таклифини қўллаб-қувватламоқчи бўлган давлатлар сони ҳозирча номаълум. Bloomberg агентлигига аноним манбанинг айтишича, мумкин бўлган чоралар Россия нефтини ташувчи кўпчилик танкерларга нисбатан санкциялар қўллашни ўз ичига олиши мумкин.            

Эслатиб ўтамиз, июнь ойи охирида Европа Иттифоқи Россияга қарши 14-санкциялар пакетини қабул қилган эди. Чеклов чоралари қаторида нефть ва нефть маҳсулотлари учун нарх чегарасини четлаб ўтиш учун фойдаланиладиган «соя флоти» нинг 27 та кемасига нисбатан санкциялар киритилган.