Айрим Европа давлатлари ва АҚШ Украина келажагига шубҳа билан қарайди. Бу эътирофни Франция Президенти Эммануэль Макрон “France 5” телеканалига берган интервьюсида айтиб ўтди.
Унга кўра, Европанинг ҳали ҳам омади бор, чунки АҚШ маъмуриятида Украинани қўллаб-қувватловчи сиёсатчилар кўп. Аммо келажакда «АҚШдаги сиёсий вазият бўйича ноаниқлик» пайдо бўлиши мумкин.
Шунга қарамай, Украина Европа билан уйғунликда тинч-тотув яшамоқчи. Франция Россия Федерацияси билан очиқчасига зиддиятга киришмаган бўлса-да, Москванинг бу урушда ғалаба қозонишига йўл қўя олмайди.
Макрон, шунингдек, Европа ва АҚШнинг Украинадаги уруш фонида эришган “муваффақиятлар”ини ҳам қайд этди. У бунга нейтрал Швеция ва Финляндияни НАТОга кириш ҳаракатларини мисол қилиб келтирган.
Муваффақиятсизликлар қаторида Франция етакчиси Ғарб санкцияларининг самарасизлигини айтиб ўтган. Макрон Россия иқтисодиётини қулатиш имконсизлигини тан олган.
“Россия иқтисодиётини чўктириш осон эмас. Шунга қарамай, яқин ойларда бу борада муҳим қадамлар қўйилади”, деган Франция раҳбари.
Маълумот учун, бунгача россиялик олимлар Ғарб давлатларининг санкциялар сиёсати натижаларини таҳлил қилишган. Улар Россия Федерациясига қарши санкция қўллаган давлатлар АҚШ «тузоғига” тушиб қолганини айтган.
