Россияда навбатдаги президентлик сайлови 2024 йил 17 мартда бўлиб ўтади. Федерация Кенгаши тегишли қарорни қабул қилди, деб хабар бермоқда “Интерфакс”.
Парламент юқори палатаси спикери Валентина Матвиенко Федерация Кенгашининг қарорини шарҳлар экан, бу “моҳиятан сайлов компанияси бошланганини англатади”, деб айтди.
Ўз навбатида, Россия Марказий сайлов комиссияси раиси Элла Памфилова Россиянинг замонавий тарихида илк бор президентлик сайловлари “бу қадар токсик геосиёсий муҳитда ўтказилишини” таъкидлади. Унинг сўзларига кўра, 8 декабрь куни Марказий сайлов комиссияси президент сайловида овоз беришни уч кун — 15, 16 ва 17 март кунлари ўтказиш тўғрисидаги қарор лойиҳасини кўриб чиқади.
Украинанинг Россияга қўшиб олинган вилоятларида сайлов ўтказиш тўғрисидаги қарор 12 декабрга қадар қабул қилинади, деди Марказий сайлов комиссияси раҳбари. Шу билан бирга, унинг сўзларига кўра, 2024 йилги президентлик сайловларида чет элдаги сайловчилар учун масофадан туриб овоз бериш кўзда тутилмаган.
Владимир Путин 2024 йилги сайловларда иштирок этишини ҳали расман эълон қилмаган.
Шу билан бирга, ОАВ Кремль аллақачон Путин иштирокидаги сайловларга тайёргарлик кўраётгани ҳақида маълум қилган. Россия президенти маъмурияти унинг сайловдаги рақиблари Россия Коммунистик партияси, Либерал-демократик партияси ва “Янги халқ” партиясидан камида 50 ёшли сиёсатчилар бўлишини кутмоқда. Путин 80 фоиздан кўпроқ овоз олиши тахмин қилинган.
