Ёшларни ҳарбий-ватанпарварлик руҳида тарбиялашга доир ишлар самарадорлигини янги босқичга олиб чиқиш, ёшлар онгига ватанпарварлик, мардлик туйғуларини сингдириш борасида юртимизда қатор лойиҳалар амалга оширилмоқда.

Таъкидлаш жоизки, ёшларни маънан етук, жисмонан баркамол бўлиб улғайишларида ҳарбий-ватанпарварлик тадбирлари муҳим аҳамият касб этади.

Шу каби эзгу ниятларни мақсад қилган “Ватанпарварлик карвони”нинг навбатдаги манзили Шўрчи туманидаги 125 сонли ожиз ва заиф кўрувчи болажонлар интернатида “Миллий армиямиз ёшлар нигоҳида!” шиори остида ҳарбий ватанпарварлик фестивали бўлиб ўтди.

Фестивал Мудофаага кўмаклашувчи “Ватанпарвар” ташкилоти ўқув ва спорт техникалари, ҳарбий оркестрдан иборат “Ватанпарварлик карвони”нинг намойиши билан бошланди.

Ўқувчиларда Хайраобод гарнизонининг ҳарбий оркестр жамоаси она Ватанни мадҳ этувчи куй ва қўшиқлари билан фестивалга кўтаринкилик бағишлаган бўлса, замонавий ҳарбий техника ва қуроллар кўргазмаси, шунингдек, фахрий қоровул шахсий таркибининг кўргазмали чиқишлари ва қўл жанги санъатидан намуналар иштирокчиларда катта таассурот қолдирди.

Шундан сўнг болажонларга ҳарбий хизматчилар эсдалик учун олиб келган совғаларини топширишди ва ҳарбий ошпазлар томонидан ўзбекона ош дамланиб байрам дастурхони ҳам қилиб берилди.

Ушбу тадбир орқали юртимизда ҳар бир ёш эътибордан четда эмаслиги, ногиронлиги бўлган болаларнинг кемтик кўнгилларига оз бўлсада меҳр нури олиб кира олди десак, асло адашмаган бўламиз.

III даражали сержан Акбар Аҳмедов, Термиз гарнизони.