Ердан 1232 ёруғлик йили узоқликда Юпитердан деярли икки баравар катта экзосайёра топилди, дея хабар беради Science Alert.
WASP-193b номини олган янги сайёра Юпитердан қарийб 50 фоиз каттароқ, бироқ шунчалик енгилки, унинг умумий зичлигини пахта конфети билан солиштириш мумкин.
Бельгиядаги Льеж университети астрономи Холид Баркауи бошчилигидаги халқаро гуруҳи хабарига кўра, WASP-193b каби экзосайёралар кам учрайди. Улар бизга сайёралар эволюциясини яхшироқ тушунишга ёрдам беради.
WASP-193b – бу қуёшга ўхшаш WASP-193 юлдузи атрофида айланадиган экзосайёра. Бу юлдуз Қуёшнинг массасидан тахминан 1,1 марта ва радиусидан 1,2 баравар катта, ҳарорат ва ёши жиҳатидан Қуёшга жуда яқин. WASP-193b юлдуз атрофида Қуёш тизимидаги барча сайёраларга қараганда анча яқинроқ айланади: у ҳар 6,25 кунда бир марта айланади.
Экзосайёра орбитасида юлдузнинг ёруғлиги қандай ўзгаришини ўрганиш Баркауи ва унинг ҳамкасбларига янги сайёранинг радиуси ва массасини ҳисоблаш имконини берди. Унинг радиуси Юпитернинг радиусидан тахминан 1,46 баравар кўп, аммо массаси у билан солиштирганда ниҳоятда кичик.
Ушбу рақамлар туфайли тадқиқотчилар экзосайёранинг зичлигини аниқлади: куб сантиметр учун 0,059 грамм. Ернинг зичлиги куб сантиметр учун 5,51 грамм. Юпитернинг зичлиги куб сантиметр учун 1,33 граммни ташкил этади, бу мантиқий – унда жуда кўп булутлар мавжуд. Пахта конфети ҳар куб сантиметр учун 0,05 грамм зичликка эга.
