Ҳодиса бўйича ФВВ ҳамда Қурилиш ва уй-жой коммунал хўжалиги вазирлиги муносабат билдирди.
8 июль куни тахминан соат 12:00 ларда Тошкент шаҳар Юнусобод тумани Ниёзбек йўли кўчасида қурилаётган янги бинонинг пойдевори учун қазилган ҳандақнинг бир четида ер ўпирилиб тушган. Оқибатда ҳандақ четидаги йўлда турган “Матиз” ва “Спарк” русумли автомобиллар ҳандаққа тушиб кетган.
Ҳодиса тўғрисида ФВВга хабар келиб тушмаган. Тарқалган хабар юзасидан воқеа жойига шаҳар ва туман ФВБ ходимлари чиқиб, ўрганиш ишларини олиб боришган. Автомобиллар махсус техника ёрдамида ҳандақдан чиқариб олинган.
Ҳодиса оқибатида тан жароҳати олган ва ҳалок бўлганлар йўқ, дейилади ФВВ хабарида.
Қурилиш ва уй-жой коммунал хўжалиги вазирлиги эса Ишчи гуруҳ тузилгани ва айни масала ўрганилганини маълум қилди.
Таъкидланишича, объектда қурилиш-монтаж ишларини олиб бориш учун аҳоли пунктлари ҳудудларидан 4,5 гектар ер майдони доимий фойдаланишга ажратилган ҳамда Чингиз Aйтматов кўчасининг лойиҳадаги қисмини беғараз очиб бериш учун 0,5 гектар ер майдони ҳам бириктириб берилган.
Ҳандақнинг ён қисмидан, яъни маҳалла ички автомобиллар йўлидан ичимлик суви қувурлари ўтган бўлиб, ушбу қувурлар эскиргани ҳисобига уларда ёриқлар юзага келган.
Оқибатда сув сизиб чиқиб, тупроқнинг намлиги ошган. Шу билан бирга ҳандақда тупроқ зичловчи техника ишлаган вақти ер қатламининг юмшаган қисмида ер кўчиш ҳолати юзага келган.
Шунингдек, ер кўчиши «Мегаполис бизнес сервис» МЧЖга ажратиб берилган (ўзига тегишли) ҳудудда содир бўлган.
Ушбу ҳолат юзасидан ҳудудга масъул инспектор томонидан буюртмачи ва лойиҳачи ташкилоти вакилларига ҳимоя тўсиқларини ўрнатиш ҳамда ҳандақ деворларини маҳкамлаш чораларини кўриб, лойиҳасини ишлаб чиқмагунга қадар ҳандақда қурилиш ишларини тўхтатиб туриш тўғрисида кўрсатма берилди.
Ҳозирда объектнинг ер кўчиш ҳолати содир бўлган қисмида техник хавфсизлик талабларига риоя қилган ҳолда ҳимоя тўсиқлари ўрнатилмоқда. Берилган кўрсатмалар устидан қатъий назорат ўрнатилиб, буюртмачи ва лойиҳачи билан биргаликда мавжуд камчиликларни бартараф қилиш чоралари кўрилмоқда.
