Украина Ҳаво кучлари қўмондонлиги 4 май куни кечаси Киев узра ўзларига тегишли “Bayraktar” дронини уриб туширди.

Қўмондонлик маълумотларига кўра, дрон режали парвозни амалга ошираётган бўлган ва бирдан бошқарувни йўқотган.

“Бошқарувни йўқотган учувчисиз бошқариладиган учиш аппаратининг пойтахт осмонида қолиши нохуш ҳолатларга олиб келиши мумкинлиги сабаб мобил ўт очиш гуруҳлари ҳисоб-китобларидан фойдаланишга қарор қилинди. Нишон яксон этилди!Афсусдамиз, лекин бу техника, бундай ҳолатлар бўлиб туради. Афтидан, муаммо техник носозликда, сабаблари аниқланмоқада”, — дейилади хабарда.

Қўмондонликнинг таъкидлашича, қурбонлар ва жабрланганлар йўқ.

Киев мери Виталий Кличко дрон қолдиқларининг қулаши оқибатида Соломенск туманида ёнғин юзага келганини маълум қилди. У ерда тўрт қаватли савдо марказида ёнғин чиққан.

“Учувчисиз учиш аппаратининг йўқ қилиниши натижасида юзага келган портлаш тўлқини бинонинг ташқи декоратив элементлари ҳамда 150 метр квадрат майдондаги ойналарга зарар етказди. Асосий конструкцияга шикаст етмаган. Жабрланганлар йўқ”, — деб ёзади Кличко.