Туркия президенти Ражаб Тоййиб Эрдоған маҳаллий телеканалларга интервью бераётганида ўзини ёмон ҳис қилди.

Қайд этилишича, эфир журналист Вазирлар Маҳкамасидаги бўлажак ўзгаришлар ҳақида савол бера бошлаганидан сўнг тўхтатилган. Узоқ танаффусдан сўнг жонли эфирга қайтган Эрдоған томошабинлардан кечирим сўради ва уларга соғлик тилади. “Кеча ва бугун сайловолди ишлари кўп бўлди. Шундай қилиб, мен ошқозон гриппига дучор бўлдим «, деди у. Президент интервьюни бекор қилиш ҳақида ўйлаганини, аммо бундай қилмасликка қарор қилганини айтди. «Биз ваъда бердик ва келдик», деб қўшимча қилди Эрдоған.

Шундан сўнг Туркия раҳбарига яна иккита қисқа савол берилди, модератор “жаноб президентга дам олишига рухсат бериш” мақсадида суҳбат якунланаётганини маълум қилди.

Маълум бўлишича, Туркия президенти Ражаб Тоййиб Эрдоғанга шифокорлар томонидан мамлакатда 14 май куни бўлиб ўтадиган сайловлар арафасида омма олдида нутқ сўзлаш тақиқланди.