Мажбурий ижро бюросининг Сариосиё туман бўлими иш юритувида бўлган фуқаролик ишлари бўйича Сариосиё туманлараро судининг 2021 йил  ноябрь ойидаги суд буйруғига асосан Б.Зоировдан бир нафар фарзандининг моддий таъминоти учун алимент ундириш ҳақидаги ижро ҳужжати келиб тушган ва ижро ҳаракатларига киришилган.

Суд ҳужжатлари ва бошқа органлар ҳужжатларини ижро этиш тўғрисидаги қонунга мувофиқ алимент тўловларини ўз вақтида ундириш мақсадида қарздорларга нисбатан Ўзбекистон Республикасидан четга чиқиш ҳуқуқлари вақтинча чекланади.

Ижро ҳужжати бўйича алимент тўловчи ота Б.Зоиров Бюронинг туман бўлимига келиб унга нисбатан қўлланилган чекловларни бекор қилишни сўраб мурожаат қилди.

Бюронинг туман бўлими томонидан чекловни бекор қилиш тартиби тушунтирилганда қарздор ота ҳисоблаб берилган 5 йиллик алимент пулини яъни 67 миллион 945 минг сўмни тўлиқ тўлаб берди.

Шундан сўнг, Мажбурий ижро бюросининг Сариосиё туман бўлими томонидан Б.Зоировнинг Ўзбекистондан четга чиқиш ҳуқуқлари тиклаб берилди.

Ахрор Хуррамов, Мажбурий ижро бюроси Сариосиё туман бўлими давлат ижрочиси