Шри-Ланка пойтахтида давлат раҳбари қароргоҳи яқинидаги тартибсизликлардан сўнг комендантлик соати эълон қилинди, деб хабар бермоқда Colombo Gazette маҳаллий нашри.
Шри-Ланка пойтахти Коломбода мамлакатдаги иқтисодий вазиятдан норозилик туфайли намойишлар бошланди. Намойишчилар президент Готабай Ражапакса уйи олдига йиғилиб, унинг истеъфосини талаб қилишди.
Нашрнинг ёзишича, полиция намойишчиларга қарши кўздан ёш оқизувчи газ ишлатган, бунга жавобан намойишчилар Коломбо чеккасидаги Ражапакса қароргоҳига олиб борувчи йўлни тўсиб қўйган автобусга ўт қўйган.
Полиция пойтахтнинг марказий, шимолий ва жанубий туманларида комендантлик соати жорий этилганини маълум қилди.
Қўшимча қилинишича, Шри-Ланка қарз мажбуриятлари туфайли зарурий товарларни, жумладан энергияни импорт қилиш муаммосига дуч келмоқда.
Association Press агентлиги берган хабарга кўра, мамлакатда кунига 12 соат ёки ундан кўпроқ электр энергияси узилиши давом этмоқда.
