Италиянинг Австралиядаги элчиси 57 ёшли Франческа Тардиоли балкондан йиқилиб тушиб, вафот этди. Бу ҳақда Cорриере ди Умбриа нашри хабар берди.

Маълум қилинишича, кўнгилсиз ҳодиса 19-феврал куни дипломат ўзи туғилиб ўсган шаҳар — Фолинёда дам олаётганида содир бўлган.

Нашр маълумотларига кўра, Тардиоли тўртинчи қаватнинг террасасидан осилиб, турганида мувозанатни йўқотган. Шу билан бирга, журналистлар Тардиоли ўз жонига қасд қилган бўлиши мумкинлигини тахмин қилмоқда. Ла Стампа газетасининг ёзишича, элчи руҳий сиқилишдан азият чекиб келган.

Канберрадаги элчихона “назокатли инсон, профессионал дипломат ва инсон ҳуқуқлари ҳимоячиси”нинг бевақт вафоти муносабати билан ҳамдардлик билдирган.

Маълумот учун, Тардиоли Канберрада 2019-йилнинг сентябридан буён элчи сифатида ишлаб келаётганди. У инглиз ва франсуз тилларида эркин гаплаша олган, немис ва испан тилларини яхши билган.

Эслатиб ўтамиз, 2021-йилнинг майида Эронда швейсариялик дипломат кўп қаватли бинодан йиқилиб ҳалок бўлганди.