Андижон вилоятининг Жалақудуқ туманида янги туғилган қиз чақалоқнинг жасади топилди.

Ҳолат бўйича Бош прокуратура Матбуот котиби Ҳаёт Шамсутдинов Uzreport.newsга маълумот берди.

Қайд этилишича, жорий йилнинг 21 январ куни соат 09:30 ларда Жалақудуқ тумани, Жанубий Оламушук шаҳарчаси, Иттифоқ МФЙ, Тикка кўчасидаги кўп қаватли уйлар жойлашган ҳудуддан янги туғилган (қиз жинсли) чақалоқнинг жасади топилган.

Мазкур ҳолат бўйича воқеа жойи туман прокурори, туман прокуратураси терговчиси, туман ИИБ бошлиғининг 1-ўринбосари, ЭКБ эксперти, вилоят суд тиббий экспертиза мутахассиси ҳамда тезкор-тергов гуруҳи аъзолари иштирокида ҳодиса жойи ва чақалоқ жасади кўздан кечирилган.

Олиб борилган терговга қадар текширув давомида мазкур чақалоқни шаҳарчанинг “Навоий” МФЙ, Бирлик кўчасидаги уйда яшовчи вояга етмаган 17 ёшли (2004 йил 1 июлда туғилган) М.Ш. яшаш уйининг ёнидаги қурилиши тугалланмаган бино ичида 20 январ куни соат 23:00 ларда ўлик ҳолатда туғиб, унинг жасадини ушбу бинонинг орқа томонига ташлаб кетганлиги аниқланган.

Соғлиқни сақлаш вазирлиги суд-тиббий экспертизаси илмий-амалий маркази Андижон филиалининг дастлабки маълумотномасида туғилган чақалоқ ўлик ҳомила экани аниқланган.

Чақалоқнинг ўлим сабабларини ҳамда баданида тан жароҳатлари ёки уларнинг излари бор-йўқлигини аниқлаш мақсадида суд-тиббий экспертизаси тайинланиб, ижро этиш учун вилоят суд-тиббий экспертиза бюросига юборилган.

Ҳозирда мазкур ҳолат юзасидан Жалақудуқ туман прокуратураси томонидан терговга қадар текшириш ҳаракатлари олиб борилмоқда.