Франсияда коронавирус тарқалишининг бешинчи тўлқини “яшин тезлигида” бошланмоқда. Бу ҳақда ҳукумат вакили Габриел Атталга таяниб, “РБК” хабар берди.

Унинг таъкидлашича, коронавирусга чалинганларнинг бир ҳафталик ўсиши ҳозирда қарийб 80 фоизни ташкил этмоқда, 100 минг аҳолига тўғри келадиган касаллар сони етти кундан камроқ вақти ичида 100 дан 164 тага ўсган. 20 minutes  порталининг ёзишича, 13-ноябр куни мамлакатда 9458 кишида коронавирус тасдиқланган бўлса, 20-ноябрда уларнинг сони 17 153 нафарни ташкил этган. Бу каби кўрсаткич пандемиянинг тез ривожланаётганидан далолат беради: олдинлари бу каби ўсиш бир ҳафтада эмас, балки уч ҳафта ичида содир бўлган.

“Биз касаликка чалиниш ҳолатларининг жуда тез ўсаётганини кўряпмиз, аммо биз, шунингдек, Франсияда ваксинация кўлами жуда кенглигини биламиз ва биз реваксинация бўйича қўшниларимиздан анча олдиндамиз”, — дейди ҳукумат вакили.

Шунга қарамай, бу каби вазиятда ҳукумат “санитария ҳужжатлари” — ваксинация ёки касалликдан тузалгани тўғрисидаги сертификатлардан фойдаланиш бўйича назоратни кучайтиради. Сўнгги кунларда улардан фойдаланишни текшириш ошган. Тўрт кун ичида фуқароларга нисбатан 70 минг ва корхоналарга нисбатан эса 4,3 мингдан ортиқ текширув ўтказилган.

Франсия парламенти июл ойи охирида коронавирус тарқалишида инсон хавфсизлигини тасдиқловчи “санитария ҳужжатлари” тўғрисидаги қонун лойиҳасини маъқуллаган. У Пфизер, Модерна, АстраЗенеcа ва Жоҳнсон & Жоҳнсон ваксиналари билан эмланганларга, шунингдек, касалликдан тузалган ёки ПЗР-тест натижаси салбий бўлганларга берилади.

Август ойидан бошлаб бу каби ҳужжат мажбурийга айланган. Унинг ёрдамида савдо марказлари, кафе ёки ресторанлар, музейлар, аттрационлар ва кинотеатрларга ташриф буюриш мумкин