Охирги пайтларда одамлар орасида «бўлиниш» пайдо бўлган. Мамлакатда жорий қилинаётган коронавирусга қарши вакциналарнинг иммун тизимга фойда беришига ишонмаётганлар, шунингдек, вакцина инсон ҳаётига жиддий салбий таъсир кўрсатади, деган фикрдаги одамлар бор.
Шунинг учун ҳозирда бутун мамлакатга вакцинация жараёнини оммалаштириш жадал суръатда кетмоқда, деб мақтана олмаймиз, ҳаттоки, республикада мажбурий эмлаш дастурини жорий этиш масаласи ҳам кўтарилмоқда. Шу кунгача бутун дунё бўйича айрим мамлакатларда мажбуриш эмлаш дастури жорий қилинган. Ҳуқуқшунос — Саидали Мухторалиев ўзининг телеграмдаги «Юристкадр» каналида мазкур мамлакатларнинг рўйхатини эълон қилди:
Австралия
Жорий йилнинг июнь ойи охирида, карантиндаги меҳмонхоналарда кекса ишчилар ва ходимлар учун COVID-19 га қарши эмлаш мажбурий ҳолга айланди. Токиога борадиган паралимпиячилар учун вакцинация мажбурий этиб белгиланди.
Англия
«Қариялар уйлари» ишчилари учун октябрь ойидан бошлаб коронавирусга қарши эмлаш мажбурий бўлади.
Франция
2021 йил 12 июлдан бошлаб, барча тиббиёт ходимлари, шунингдек, кинотеатрга ташриф буюриш истагида бўлган ёки поездда сафарга чиқишни режалаштирганлар эмлаш гувоҳномасини ёки тестнинг салбий натижасини кўрсатиши шарт.
Греция
2021 йил 12 июлдан “Қариялар уйи” ишчиларини эмлаш мажбурий бўлди, сентябрдан бошлаб фақат вакцинани олган фуқароларгагина бар, кинотеатр, театр ва бошқа ёпиқ жойларга ташриф буюришга рухсат берилади.
Индонезия
2021 йил февраль ойидан бошлаб эмлаш мажбурийдир. Индонезия пойтахти Жакартада вакцина олишдан бош тортган шахслар 5 миллион рупийгача (357 доллар) жаримага тортилади.
Италия
2021 йил март ойида барча тиббиёт ходимлари, шу жумладан, фармацевтлар мажбурий эмлашдан ўтдилар. Эмлашдан бош тортган ишчиларга бир йил давомида маош тўланмайди.
Қозоғистон
2021 йил июнь ойидан бошлаб 20 дан ортиқ соҳаларда фаолият юритаётган одамлар мажбурий эмлашдан ўтди, эмланишни хоҳламаганлар учун эса ҳафталик тестлар ўтказилди.
Польша
2021 йил август ойидан бошлаб юқори тоифадаги фуқароларнинг айрим тоифаларига мажбурий эмлашни амалга ошириш режалаштирилган.
Россия
Москвада 2021 йил июнь ойининг охиридан бошлаб, фақатгина эмланган ёки COVID-19 билан касалланмаганлигини кўрсатадиган тест натижаси салбий бўлган кишиларга кафе, бар ва ресторанларга киришга рухсат берилади.
Саудия Арабистони
2021 йил майдан бошлаб давлат ва хусусий сектор ишчилари ишга бориш учун мажбурий вакцина олишлари керак бўлади (бунинг учун ҳеч қандай муддат йўқ). Шунингдек, 1 августдан бошлаб жамоат транспортидан фойдаланган ҳолда ҳар қандай давлат, хусусий ёки таълим муассасаларига ташриф буюриш учун мажбурий эмлаш белгиланади.
