Узун туман адлия бўлими томонидан туманнинг мактабгача таълим бўлимида ахборот-коммуникация технологиялари бўйича мутахассис лавозимида ишловчи фуқаро Б.М га тўланмай қолган 9 миллион 199 минг 733 сўм устама пули ундириб берилди.
Фуқаро Б.М ушбу лавозимда ишлаб, ўзига тўланиши шарт бўлган устама пуллари тўланмасдан келаётганлигини билдириб, ундириб беришда амалий ёрдам сўраб туман адлия бўлимига мурожаат қилган.
Ўзбекистон Республикаси Президентининг 2018 йил 19 февралдаги “Ахборот технологиялари ва коммуникациялари соҳасини янада такомиллаштириш чора-тадбирлари тўғрисида»ги фармонининг 7-бўлим г-бандида давлат органлари ва бошқа бюджет ташкилотларининг замонавий ахборот технологиялари ва коммуникацияларини жорий қилиш ва ривожлантиришга маъсул бўлган ходимларга бериладиган ҳар ойлик устама миқдори ходим лавозим маошидан 100 фоиздан кам бўлмаган миқдорда белгиланади, деб кўрсатилган.
Ўзбекистон Республикаси Меҳнат кодексининг 153-моддасида Меҳнат ҳақи шакли ва тизимлари, мукофотлар, қўшимча тўловлар, устамалар, рағбатлантириш тарзидаги тўловлар жамоа шартномаларида, шунингдек иш берувчи томонидан касаба уюшма қўмитаси ёки ходимларнинг бошқа вакиллик органи билан келишиб қабул қилинадиган бошқа локал ҳужжатларда белгиланади. Меҳнат кодексининг 154-моддасида Меҳнатга ҳақ тўлаш кафолатлари белгиланган бўлиб, иш берувчи ўзининг молиявий ҳолатидан қатъий назар, ходимга бажарган иши учун белгиланган меҳнат ҳақи шартларига мувофиқ ушбу Кодекснинг 161-моддасида кўрсатилган муддатларда тўлаши шарт, деб белгилаб қўйилган.
Мурожаатни ўрганиш давомида туман мактабгача таълим бўлими томонидан фуқаро Б.М га тегишли устама пуллари тўланмасдан келингани аниқланди. Натижада Ўзбекистон Республикаси Меҳнат кодекси талаблари бузилган. Туман адлия бўлими томонидан мактабгача таълим бўлимига тақдимнома киритилиб, тўланмасдан қолган 9 миллион 199 минг 733 сўм миқдоридаги устама пуллари ундириб берилди ва айбдор шахсларга нисбатан белгиланган тартибда интизомий жавобгарлик қўлланилди.
Б.Авазов
Узун туман адлия бўлими етакчи маслаҳатчиси, 3-даражали юрист
