АҚШда 1892 йилда Буюк кўлларда чўкиб кетган Western Reserve кемасининг қолдиқлари топилди. Ҳодиса оқибатида 27 киши ҳалок бўлганди, деб ёзади Associated Press.
Western Reserve тўлиқ пўлатдан қурилган дастлабки юк кемаларидан бири эди. Узунлиги 91 метр бўлган бу кема сувдаги энг хавфсиз кемалардан бирига айланиши кутилган. Унинг эгаси Питер Минч кемаси билан шу қадар фахрланганидан 1892 йил август ойида рафиқаси ва ёш болаларини ўзи билан саёҳатга олиб чиққан.
30 август куни кема Юқори кўлдаги Уайтфиш кўрфазига кирганида бўрон кўтарилган. Кема тўлқинлар зарбига дош бера олмай иккига бўлиниб кетган. Барча йўловчилар орасидан фақат рул бошқарувчиси омон қолган. У аввалига қутқарув қайиғида, сўнг қайиқ ағдарилганидан кейин ўзи қирғоққача 1,6 километр масофани сузиб ўтишга муваффақ бўлган.
2024 йил июлида Буюк кўллар кема ҳалокатларини ўрганувчи олимлар кўплаб чўккан кемаларга дуч келди. Улардан бири технологик жиҳатдан анча ривожланган бўлиб чиқди. Western Reserve кемаси “жиддий шикастланган” бўлса-да, унинг қолдиқлари совуқ чучук сувда яхши сақланиб қолган.
Олимларнинг таъкидлашича, Буюк кўлларда кучли бўронлар мавсуми фақат ноябр ойида бошланади. Кема корпусининг заифлиги ва тўлқинларга бардош бера олмагани сабабли чўкиб кетган бўлиши мумкин. Маълум қилинишича, “Титаник”ни қуришда Western Reserve учун ишлатилган пўлатдан фойдаланилган. Бу кеманинг жуда тез чўкишига сабаб бўлган омиллардан бири бўлиши мумкин.
