АҚШ президенти Дональд Трамп маъмурияти мамлакатнинг Иммиграция ва божхона хизмати (ICE)га минглаб мигрант болаларни аниқлаш ва депортация қилишни буюрди. Reuters агентлигининг хабар беришича, ушбу операция ички хизмат ёзишмаларида кўрсатилган

Мигрант болаларни аниқлаш ва депортация қилиш жараёни тўрт босқичдан иборат бўлиб, биринчи босқич – операцияни режалаштириш – 27-январ куни амалга оширилган. Шунингдек, ташаббус қаровсиз қолган мигрант болаларнинг одам савдосига тушиб қолишини олдини олишга қаратилган. ICE учта устувор гуруҳга эътибор қаратади: «қочиш хавфи», «жамоат хавфсизлиги» ва «чегара хавфсизлиги».

АҚШ ҳукумати маълумотларига кўра, 2019-йилдан бери 600 мингдан ортиқ мигрант бола АҚШ-Мексика чегарасини кесиб ўтган. Шу вақт ичида АҚШ иммиграция суди статистикасига кўра, ўн минглаб одамлар депортация қилинган, уларнинг 31 мингдан ортиғи суд мажлисларига келмаганлиги сабабли чиқариб юборилган.

Ўтган президентлик муддати давомида Дональд Трамп ноқонуний мигрантларга нисбатан кескин фикрларни илгари сурган. Масалан, у АҚШ ва Мексика чегарасида девор қуришни таклиф қилган эди. Энди эса, Оқ уй раҳбари яна иммиграция сиёсатини қатъийлаштирмоқда. Трамп инаугурациясидан кейин бир ҳафта ичида ICE 2,5 мингдан ортиқ ноқонуний мигрантни қўлга олди, шундан қарийб 1 минг нафари фақат 26-январ куни ҳибсга олинган.