Бойсун туманида туман Мудофаа ишлари, қўриқлаш ва фавқулодда вазиятлар бўлимлари ходимлари иштирокида Термиз ҳарбий прокурори Ш.Х. Мирзаев томонидан кенг кўламли оммавий сайёр қабул ташкил этилди. Тадбирда жисмоний ва юридик шахслар, ёшлар, ҳарбий хизматчилар ва уларнинг оила аъзолари иштирок этиб, ўз ҳуқуқлари, эркинликлари ҳамда қонуний манфаатларини амалга ошириш борасидаги масалаларни муҳокама қилиш имкониятига эга бўлдилар.

Сайёр қабулнинг асосий мақсади фуқароларнинг мурожаатларини тўғридан-тўғри қабул қилиш, мавжуд муаммоларни жойида ҳал қилиш ва ҳарбий хизматчилар ҳамда уларнинг оилаларига ҳуқуқий ёрдам кўрсатишдан иборат. Шунингдек, ҳарбий хизматчиларнинг хизмат жараёнида юзага келган муаммолар, уларнинг оила аъзоларининг ижтимоий ҳимояси ва моддий таъминоти билан боғлиқ масалалар ҳам кўриб чиқилди.

Тадбирда мурожаатлар асосида ҳукумат органлари томонидан бир қатор чоралар кўрилди ва уларнинг айримлари жойида ҳал этилди. Қолган муаммолар бўйича тегишли идоралар вакиллари билан келишувлар асосида чора-тадбирлар белгилаб олинди.

-Давлат ва ҳуқуқни муҳофаза қилиш органларининг асосий вазифаларидан бири бу фуқароларнинг ҳуқуқ ва манфаатларини ҳимоя қилиш, шу жумладан ҳарбий хизматчилар ва уларнинг оила аъзолари учун қулай ҳуқуқий шароит яратишдир,-дейди  Термиз ҳарбий прокурори Ш.Х. Мирзаев. -Ушбу сайёр қабул орқали ҳукумат фуқаролар билан мулоқотни янада самарали қилишни ва муаммоларни ҳал этиш жараёнини тезлаштиришни мақсад қилган.

Мазкур тадбир ҳарбий хизматчиларнинг хизматдаги фаолиятини янада самарали ташкил этиш ва уларнинг ижтимоий ҳимоясини кучайтиришга қаратилган саъй-ҳаракатларнинг бир қисми бўлиб, бундай оммавий сайёр қабуллар келгусида ҳам давом эттирилиши кўзда тутилган.