ПСЖ ҳужумчиси Килиан Мбаппе ва унинг собиқ жамоадоши Неймар Instagram’да бир-бирларини кузатишни тўхтатди.
Неймар ПСЖни тарк этишдан олдин Мбаппени танқид қилувчи нашрларни кузатиб борарди. Эътиборлиси, Неймар кузатадиган профиллар орасида Килиан Мбаппенинг укаси Этан Мбаппе бор.
31 ёшли Неймар ёзда Саудия Арабистонининг “Ал-Ҳилол” клубига ўтди. Футболчи ҳали янги жамоаси таркибида дебют қилгани йўқ.
Бразилиялик ҳужумчи 2017 йилдан буён француз клубида ўйнаб келаётганди. ПСЖ таркибида Неймар жами 173 та ўйин ўтказиб, 118 та гол урди ва 77 та голли узатмани амалга оширди. ПСЖ таркибида бразилиялик футболчи беш марта Франция чемпиони бўлди, уч марта Франция кубогини қўлга киритди ва Европа Чемпионлар лигаси финалига чиқди.
