Одамзод денгизларда сузиш учун қайиқ-кемалар ясаган, парвоз қилиш учун самолёт, ўзга сайёраларга етиб бориш учун ракета, космик кемалар ихтиро қилди. Ерда эса у уй қурди, боғ яратди, шаҳарлар барпо этди. Ўтган давр мобайнида қанчадан-қанча шаҳарлар, давлатлар, салтанатлар пайдо бўлди. Қанча чиройли тадбирлар амалга оширилиб, гўзал иншоотлар барпо этилди. Буларни кўриб очиғи кишининг қалби қувонади.

Аммо ана шу гўзаллик, яратувчанлик, бунёдкорлик ишларига лоқайдлик, беэътиборлик билан қарашимиз ҳам бор гап.

Сиз суратда кўриб турганингиз Термиз шаҳрининг қоқ маркази, шундоққина вилоят ҳокимлиги биноси ёнидаги майдонда олинган.

Асосий байрам тадбирлари ўтказиладиган майдон бурчаги ахлатхонага айлантирилибди чоғи… Анҳор устига қўйилган кўприк ҳам «савлат» тўкиб, эскириб, устидаги бетон-асфальтлари чўкиб ҳам бўпти. Яна бироз сабр қилинса, бутунлай анҳорга кўприкнинг ўпирилиб тушиши ҳеч гапмас.

Бу ерда эса яқиндагина Олимпиада чемпионларини кутиб олиш, сиёсий муҳим жараён олдидан ташкиллаштирилган «дрон шоу» маросимлари ўтказилган «Болажон» боғи. Суратларда кўриб турганингиздек, уюм ахлатлар боғ кўркини бузиб турибди.

Шаҳар марказидаги бундай манзарани кўрган ҳар қандай кишининг кайфияти бузилиши аниқ. Хуллас, ҳаммамизга инсоф берсин, зеро шаҳар тозалиги-ю, ободлигига барчамиз бирдек масъулмиз.