Франциянинг Ўзбекистондаги элчиси этиб тайинланган Валид Фук ўз вазифасини бажаришга киришди, деб хабар берди элчихона матбуот хизмати.
Дипломат ўзбек тилида мурожаат қилиб, «минг йиллик маданияти ва меҳмондўстлиги билан машҳур Ўзбекистонда иш бошлаганидан хурсандлигини» билдирди.
– Мамлакатларимизнинг тарихий яқинлашувига кўмаклашиш учун барча саъй-ҳаракатларни амалга ошираман, — деди у ўз нутқида. — Келгуси ойларда сиз билан бирга Франция ва Ўзбекистонни боғлаб турган дўстлик ришталарини мустаҳкамлаш ва умумий тараққиётга эришиш учун барча ҳудудларга ташриф буюриш ниятидаман.
Маълумот ўрнида: Валид Фук Париж Сиёсий тадқиқотлар институтини тамомлаган, сўнгра Франция Ташқи ишлар вазирлигининг Стратегик масалалар, хавфсизлик ва қуролсизланиш бошқармасида ишлаган.
Кейинчалик Франциянинг Пекиндаги элчихонаси ва БМТ доимий ваколатхонасида сиёсий маслаҳатчи, шунингдек, 2020-2025 йилларда Франция президентининг Осиё, Океания ва Америка бўйича маслаҳатчиси бўлган.
Валид Фук янги лавозимда 2021 йилдан буён фаолият юритган Орелия Бушез ўрнини эгаллади.
