Рим папаси Франсиск узоқ муддатли пневмония даволанишидан сўнг шифохонадан чиқди.

Маълумот учун, 88 ёшли Франсиск 14 февраль куни бир неча кунлик нафас олишдаги қийинчиликлардан сўнг Римдаги касалхонага ётқизилган эди. 18 февралда папага икки томонлама ўпка яллиғланиши ташхиси қўйилган эди. Шифокорларнинг айтишича, у Ватиканда камида икки ой давомида дам олиши керак бўлади.

Ватикан маълумотига кўра, якшанба куни у Римдаги Агостино Гемелли касалхонасидан Анжелус намозидан сўнг дуо қилишни режалаштирмоқда.

Сўнгги йилларда Рим папаси бир неча бор грипп билан касалланиб, турли соғлиқ муаммоларига дуч келган. У ёшлигида плеврит билан оғриб, ўпкасининг бир қисми олиб ташланган. Шунингдек, тиззасидаги муаммолар туфайли ногиронлар аравачасидан фойдаланади ва 2021 йилда ичак операциясини ўтказган.

Понтифик соғлиғи туфайли ўз вазифаларини тўлиқ бажара олмаслигини сезса, лавозимидан истеъфо беришини истисно этмади.