Орамиздаги айрим кимсалар доим бошқаларнинг мулкига кўз олайтириб юради. Фурсат бўлди-ки, уларга эгалик қилиш ниятида бўлади.

Дарҳақиқат, босқинчилик яъни ўзганинг мол-мулкини талон-торож қилиш мақсадида ҳужум қилиб, ҳаёт ёки соғлиқ учун хавфли бўлган зўрлик ишлатиб ёхуд шундай зўрлик ишлатиш билан қўрқитиб содир этиладиган жиноятдир.

Босқинчилик жинояти ўзининг содир этилиш усули, келиб чиқиши мумкин бўлган оқибатига кўра, мулкка қарши жиноятлар сирасида – энг хафвлисидир.

Шўрчилик Анвар Хайдаров (исм-фамилиялар ўзгартирилган) эндигина 27 ёшни қаршилаган бўлса-да, лекин босқинчилик жиноятини содир этишга улгурди. Буни қарангки, у бунгача икки маротаба ўғирлик жиноятини ва бир маротаба босқинчилик жиноятини содир этган эди. Охирги маротаба босқинчилик жиноятини содир этганлиги сабабли суднинг қора курсисида ўтириб, тавба қилмасдан, текин даромад топиш илинжида бўлади.

Анвар кунларнинг бирида ўзганинг мол-мулкини талон-торож қилиш йўли билан бойлик орттириш мақсадида, ўзининг бошқарувида бўлган “Ваз-21011” русумли автомашинаси билан Шўрчи тумани “Боботоғ” махалласи худудида харакатланиб кетаётган вақтида, фуқаро Наргиза Болтаевани йўлнинг четки қисмида ёлғиз турганлигини кўриб қолади. Шунда Анвар автомашинасини унинг ёнига бориб тўхтатиб, Наргизанинг ёнида бўлган нарса ва буюмларни уни қўрқитиш йўли билан эгаллашни ўзига мақсад қилиб, уни автомашинасига мажбурий равишда миндиради. Шу тариқа автомашина билан ҳаракатланган ҳолда Наргизани Шўрчи тумани “Қоқайди” махалласи худудидаги ички кўчага олиб бориб, уни ўлдириб юбориш билан қўрқитади. Анварнинг бу ҳаракатини Наргиза кутмаган эди.

Шундан сўнг Анвар Наргизага ҳужум қилиб, қўллари билан унинг юз, кўкрак ва танасининг бошқа соҳаларига қасддан уриб, Наргизанинг бир дона баҳоси 500.000 (беш юз минг) сўм бўлган “Redmi-Note 5” русумли телефон аппаратини босқинчилик йўли билан олиб қўйиб, ҳодиса жойидан яширинади.

Бу вақтда Наргиза узоқда бир ёруғлик уйни кўрганлиги учун шу тарафга қочиб кетади ва ўша уйга бориб ўлиб ўтган ҳолатларни уй эгасига айтиб беради. Сўнг улар  зудлик билан Ички ишлар органига хабар беришади.

Терговга қадар текширув ҳаракатлари давомида Анвар Хайдаровдан Наргизанинг “Redmi-Note 5” русумли телефон аппарати тегишли тартибда расмийлаштириб олинади.

Албатта, ўзгалар мулкини босқинчилик йўли билан қўлга киритиш қонунларимизда жиноят ҳисобланади. Жиноятга эса жазо ҳамиша муқаррар.

Текин даромад, ўзгалар мол-мулкига кўз олайтириш, босқинчилик қилиш ҳеч қачон яхшилик билан тугаган эмас. Ўғирлик ва босқинчилик жиноятини ўзига касб қилиб юрган Анвар Хайдаровнинг қилмишлари жиноят ишлари бўйича Шўрчи туман суди томонидан 10 йилу 6 ойга озодликдан маҳрум қилиш жазосини тайинлади.

Шундай экан, жиноятга жазо муқаррар эканлигини доимо ёдда сақлаш зарур.

ТАХИР БЕКПУЛАТОВ, Сурхондарё вилоят суди жиноят ишлари бўйича судьяси