Ўзбекистон элчиси Ойбек Шахавдинов Венгриянинг «Фиделитас» ёшлар ташкилотининг ташқи ишлар бўйича раиси ўринбосари Дора Хидаш билан учрашди.

Суҳбат чоғида Венгрия томони Ўзбекистон ёшлар ташкилотлари билан яқин ҳамкорликни йўлга қўйишдан манфаатдор эканини таъкидлади.

Ташкилот раиси ўринбосари ўзи бошчилигидаги Венгрия делегацияси жорий йилнинг 25-30 июнь кунлари Ўзбекистонда бўлиб ўтадиган Халқаро ёшлар фестивалида иштирок этишга таклиф қилингани учун миннатдорлик билдирди. «Бу ўзбекистонлик ҳамкорлар билан алоқа ўрнатиш учун яхши имконият яратади», деди у.

Учрашув якунлари бўйича ушбу йўналишдаги ҳамкорликни ривожлантириш мақсадида ўзаро мулоқотларни давом эттириш бўйича келишувга эришилди.

«Фиделитас» ташкилоти 1996 йил октябрь ойида ташкил этилган. У Венгриянинг ҳукмрон «Фидес» партиясининг етакчи ёшлар ташкилотларидан бири ҳисобланади.