Россия оммавий ахборот воситаларида Германиянинг юқори мартабали ҳарбий хизматчилари ўртасида Қрим кўпригига ҳужум қилиш режалари муҳокама қилингани ҳақида хабарлар тарқалди. Немис офецерлари суҳбатининг ёзуви эълон қилиниши Германия Қуролли Кучлари (Бундесвер) учун «ёқимсиз сюрприз» бўлди. Бу ҳақда “Bild” газетаси хабар берди.
«Бундесвер бу ҳақиқий эканини ҳали расман тасдиқламаган бўлса ҳам, кўп нарса ёзувнинг ҳақиқийлигидан далолат беради», деб ёзади “Bild”.
Манбага кўра, Бундесвер «зарарни камайтиришга уринган» ҳолда мазкур суҳбат ёзувини тарқатган Х аккаунтлари Германияда блокланган. Немис ҳарбийларининг суҳбатини ким ва қандай ёзиб олишга муваффақ бўлгани ҳозирча номаълум.
“Bild”нинг қайд этишича, суҳбат иштирокчиларидан бири Сингапурдаги меҳмонхонада бўлган, шунинг учун у ҳимояланмаган алоқадан фойдаланган бўлиши мумкин.
Маълумот учун, гап “Russia Today” бош муҳаррири Маргарита Симонян томонидан кеча, 1 март куни VKontakte’да эълон қилинган суҳбат стенограммаси ҳақида кетмоқда. Симоняннинг ёзишича, 19 февраль куни Бундесвер Ҳарбий-ҳаво кучлари қўмондонлигининг операциялар ва машқлар бўлими бошлиғи Грефе, Бундесвер инспектори Герхарц ва Бундесвер космик қўмондонлиги ҳаво операциялари маркази ходимлари Фенске ва Фроштедте ўртасида TAURUS ракеталари ёрдамида Қрим кўпригига зарба бериш ҳақида суҳбат бўлиб ўтган.
