Айни кунларда Сурхондарё вилоятидаги “Huashen Silkworm Pro” қўшма корхонасида хорижий тажриба асосида 250 қути ипак қурти парваришланмоқда. Ушбу ипак қуртлари пилла ўрашга киришган ва ҳар бир қути ипак қуртидан 85-90 кг ҳўл пилла ҳосили олинмоқда.
Корхона 2017 йил ташкил этилган бўлиб, ҳозирда у ерда 120 дан ортиқ хотин-қиз иш билан таъминлаган. Уларнинг 25 нафарини доимий ишчилар ташкил қилади. Келгусида корхона томонидан 20 минг қути ипак қурти парваришлаб, ипак қурти уруғларини бутунлай маҳаллийлаштиришни йўлга қўйиш мақсад қилиб олинган.
Ипакчилик ва жун саноатини ривожлантириш қўмитаси раиси Баҳром Шарипов ҳамда Сурхондарё вилоят ҳокими Улуғбек Қосимов мазкур хорижий қўшма корхона иш фаолияти билан танишди.
Корхонада ипак қурти уруғини тайёрлаш жараёнлари кўздан кечирилиб, корхона раҳбарлари, хорижий ҳамкорлар билан суҳбат қилинди. Илғор пиллакорларга эсдалик совғалар топширилди.
Шунингдек, “Ангор агропилла” МЧЖнинг пилла қабул қилиш масканида вилоят пиллакорлари билан учрашув бўлиб ўтди.
Учрашувда бу йилги пилланинг нави ҳам ҳосил сифати ҳам юқори эканлиги қайд этилди. Пиллакорларнинг фидокорона меҳнатлари натижасида бир қути ипак қуртидан 90 кг пилла ҳосили олингани эътироф этилди.
