Америка Қўшма Штатларининг Флорида штатида яшовчи аёл бетоб бўлган эрини ўлдирди. Бу ҳақда zamon.uz хабар бермоқда.
76 ёшли Эллен Гилланд жиноятни Дайтона-Бичдаги шифохона хонасида содир этган. Тергов маълумотларида келтирилишича, аёл ўзининг 77 ёшли эри Жерри Гилланд илтимосига кўра уни отиб ташлаган. Жерри саломатлиги ёмонлашса, хотинидан отиб ўлдиришни сўраган.
Қотилликдан кейин аёл ўз жонига қасд қилмоқчи эди, лекин режасини амалга ошира олмади. Кекса аёлни эрининг хонасидан олиб чиқиб, ҳибсга олиш учун полицияга тўрт соат вақт керак бўлди.
Гилланд хоним дастлаб биринчи даражали қотилликда айбланган ва гаров рад этилган. Бироқ судья аёлга қўйилган айбловни ўз жонига қасд қилишга кўмаклашиш, оғир тажовуз ва ҳуқуқни муҳофаза қилувчи орган ходимига нисбатан оғир тажовуз қилиш айбловлари билан ўзгартирди.
Кейинчалик аёл 150 минг доллар гаров эвазига озод қилинди. Гилланд кузатув остида бўлади. У дори-дармонларни қабул қилиши, ўқотар қурол сақлаши ва қўллаши, зарурат бўлмаса, шифохоналарга бориши тақиқланади.
