Ер юзидаги ўртача ҳароратни целсий бўйича 1,5 даражага камайтириш мумкин бўлган тақдирда ҳам, аср охирига келиб дунё музликларининг ярми йўқ бўлиб кетади. Бу ҳақда Science илмий журналида чоп этилган мақолада айтилади.
Унда ер юзасида мавжуд бўлган барча музликлар маълумотлари ҳисобга олинган, дея хабар беради Euronews.
Тадқиқотчиларнинг ҳисоб-китобларига кўра, агар глобал ўртача ҳарорат ҳозирги суръатларда ўсишда давом этса, аср охирига келиб музликларнинг учдан икки қисми йўқ бўлиб кетади.
Марказий Европа, Ғарбий Канада ва АҚШда жойлашган 1 квадрат километрдан кичик музликлар энг кўп хавф остида. Бу ўзгаришлар ҳозир аниқ кўриниб турибди: масалан, Альп музликларининг чекиниши бир неча ўн йиллар давомида давом этмоқда ва ҳозир тезлашмоқда.
Музликларнинг эриши қутб қопқоқларининг эриши билан бирга глобал исишнинг энг хавфли оқибатларидан бири – денгиз сатҳининг кўтарилишига ёрдам беради. Бу эса, ўз навбатида, бутун дунё бўйлаб муҳим қирғоқбўйи ҳудудларини, шунингдек, бир қатор орол штатларини сув босишига олиб келади.