Р.Б фирибгарлик, яъни хавфли рецидивист бўла туриб, ўзганинг мулкини алдаш ёки ишончни суиистеъмол қилиш йўли билан қўлга киритиш мақсадида, 2021 йилнинг 5 март куни Л.Гга ўзини “Алишер” деб таништиради. Сўнгра уйида бир кеча тунаб қолиш учун жой сўраб бориб, гуруч савдоси билан шуғулланишини, айни вақтда Хоразм вилоятидан “Камаз” юк машинасида гуруч маҳсулоти олиб келаётгани сабабли юкни қабул қилиб олиш, йўл хақи ва бошқа харажатлар учун майда купюрада пул маблағи кераклигини, ёнида 100.000.000 сўм пули бўлсада уларни йирик купюрадаги пуллар эканлигини айтиб, Л.Гнинг ишончига кириб, алдаб унга қора рангли целофан пакетга ўралган скотчланган 100.000.000 сўм пулни сақлаб туришлик учун топшириб, Л.Гнинг 18.500.000 сўм нақд пули ҳамда бозор нархи 3.000.000 сўмлик “Samsung А30” русумли телефон аппаратини қўлга киритиб, шахсий эҳтиёжларига ишлатиб юборган.
Энг қизиғи, Р.Б томонидан 100.000.000 сўм деб қолдириб кетилган целофан пакет очиб кўрилганда ичида 4 дона қўл артадиган нам латталар (влажний салфетка) борлиги аниқланган.
Судланувчи Р.Б Ўзбекистон Республикаси ЖК 168-моддаси 3-қисмининг “б” бандида назарда тутилган жиноятни содир қилганликда айбли деб топилиб, унга ушбу модда билан 5 йил муддатга озодликдан маҳрум қилиш жазоси тайинланди.
Судланувчи Р.Бдан жабрланувчи Л.Г фойдасига 21.500.000 сўм ундириш белгиланди.
Тайинланган озодликдан маҳрум қилиш жазоси қаттиқ тартибли колонияларда ўталиши белгиланди.
Адиз Авезов, Жиноят ишлари бўйича Қизилтепа туман суди раиси
