Туркиянинг «Фенербахче» клуби ярим ҳимоячиси Месут Ўзил клуб таркибидан четлатилди. Бу ҳақида Истанбул жамоаси матбуот хизмати маълум қилди.

33 ёшли футболчи билан бирга жамоанинг бошқа бир аъзоси Ўзан Тўфон ҳам таркибдан четлатилган. “Фенербахче” нима сабабдан бундай қарор қабул қилингани борасида эса маълумот мавжуд эмас.

Инглиз нашрларининг хабар беришича, Туркия чемпионатининг 30-туридан ўрин олган “Фенербаҳче” – “Коняспор” (2:1) ўйинида Месут ва Ўзан бош мураббий вазифасини бажарувчи Исмоил Картал билан кескин тортишиб қолган. Ўзил ўша ўйинда биринчи бўлимдан кейин захирага олинган, Тўфан эса 90-дақиқада майдонга туширилганди. Карталнинг раҳбарият билан учрашувидан кейин футболчилар номаълум муддатга четлатилган.

Эслатиб ўтамиз, Ўзил “Арсенал”да Микел Артета ва раҳбарият билан тортишиб қолган ва 2021-йилнинг қишида лондонликлар сафини тарк этганди. Агар ҳозирги клубида ҳам мураббий ўзгармаса, у бу ерни тарк этиши кутилмоқда.

Аввалроқ, ЙЧЛ доирасидаги “Реал”га қарши мағлубиятдан сўнг ПСЖ футболчилари Неймар ва Доннарумма ўзаро жанжаллашиб кетгани ҳақида хабар берган эдик.