Янги Зеландия ҳомиладор бўлган журналисти Шарлотта Беллиснинг туғиш учун ортга қайтишига ҳам изн бермаган. Бу ҳақда BBC хабар бермоқда

Толибон сизга – ҳомиладор, турмушга чиқмаган аёлга хавфсиз бошпана таклиф қилганидан аҳволимнинг қандайлигини тасаввур қилаверинг, деб ёзди Шарлотта. Коронавирус чекловлари боис, уни ўзининг ватани – Янги Зеландия ортга қайтарган. Ҳатто кўзини ёриб олиши учун ҳам мамлакатга киришига изн бермаган.

Рад жавоби ортидан чорасиз қолган Янги Зеландиялик ҳомиладор журналист Шарлотта ва йигитининг фақат Афғонистонга визалари бўлган.

Икковлон визани ўтган йили АҚШ ҳарбийларининг чиқиб кетишини ёритиш учун Афғонистонга борган пайтларида олишган.

Ўз мамлакати киришига изн бермаганидан сўнг, улар Толибон муваққат ҳукуматига мурожаат қилишган.

Шарлоттанинг ёзишича, толиблар ўзларининг сўровларини рад қилишмаган.

Афғонистонга бемалол келаверишлари мумкинлиги, бунинг ҳеч бир муаммоси йўқлигини айтишган.

«Фақат одамларга ўзларини эр-хотин, деб танитишлари кераклиги»ни таъкидлашган.

«Агар жанжал кўтарилса, ўзларига мурожаат қилишлари»ни сўрашган.

Толибон эса, шу пайтгача фаолларини қўлга олиш, қийнаш ва ҳатто ўлдириш билан хотин-қизлар ҳуқуқларини шафқатсиз равишда поймол қилишда танқид қилиб келинган.

Мактуб

Шарлоттанинг қисмати Янги Зеландия ҳукумати коронавирусга қарши кураш чораларининг қанчалик кескин эканини яна кун тартибига олиб чиққан.

Бошқалар эса, журналистнинг Толибон билан хос муносабатларига эътиборларини қаратишган.

Ҳомиладор аёлнинг кечмишларини Янги Зеландиянинг Herald газетаси чоп қилган.

Унда Шарлоттанинг ёзишича, фарзандини Янги Зеландияда дунёга келтирмоқчи бўлган.

Ўтган ҳафта бу хусусда расман масъулларга мурожаат қилган, аммо рад жавобини олган.

Расмий Веллингтон жорий пайтда 10 кун меҳмонхонада карантинда ўтиришлари шарти билан фуқаролари ва доимий яшаш ҳуқуқига инсонларнинг Янги Зеландияга киришига изн беради.

Аммо талаб юқори ва жой кам экани боис, Янги Зеландияга қайтиш умидида бўлган кўпчилик мамлакатга киролмайди.

Шарлотта буни ўзи мисолида толибларнинг расман оилали бўлмаган ҳомиладор аёлга қилган муносабатларига қиёслаган.

Аммо Афғонистоннинг ўзида турмушга чиқмай туриб, ҳомиладор бўлган аёлларга нима бўлиши маълум эмас.

Бева қолган афғон аёлларининг Толибон расмийлари томонидан тез-тез тазйиқларга учраши, васийлик ҳуқуқларининг топталиб, фарзандларидан воз кечишлари учун босимлар остида қолишаётганига оид хабарлар бор.

 Оқлов

Шарлоттанинг мактуби ортидан Янги Зеландия ҳукуматини фавқулодда карантин чораларини ҳомиладор аёлларга мослаштиришга чақирувчи даъватлар кучайган.

Кўпчиликнинг диққатига тушган мазкур воқеадан сўнг расмий Веллингтон ўзининг сиёсатини ҳимоя қилиб чиққан.

Ковид-19 га қарши курашишга маъсул вазири Крис Ҳипкинснинг айтишича, амалдаги сиёсатлари мамлакатда жуда яхши иш берган, инсонларнинг ҳаётларини асраб қолган, касалхоналарга тушишни камайтирган ва соғлиқни сақлаш тизимини қулашдан асраган.

Вазирнинг қўшимча қилишича, Янги зеландиялик мулозимлар Шарлотта билан яна алоқага чиқишган.

Унга фавқулодда ҳолат таснифида қайта виза сўраб, мурожаат қилишни таклиф қилишган.

Шарлоттанинг айтишича, мактуби эълон қилиниши ортидан яна бир давлат ўзига бошпана беришга розилигини билдирган.

Аммо журналист унинг айнан қай бир мамлакат эканидан ном тутмаган.

Афғонистоннинг ўзида эса, унинг қисмати кузатувчилар, инсон ҳуқуқлари фаоллари ва маҳаллий аҳолининг танқидларига учраган.

Австриядан асли афғонистонлик журналист Имрон Фируз, «бу Толибоннинг афғон бўлмаганларга нисбатан ўзгача муносабатининг яна бир далолати» эканини ёзиб, твит қилган.

Толибонни уйларига рейдлар уюштирилиб, олиб кетилганларидан бери бедарак кетган аёлларни озод этишга чақирувчи даъватларнинг янграганига ҳам унча кўп бўлгани йўқ.