Бугунги кунда фарзандларини олий ўқув юртларига киритмоқчи бўлиб юрган баъзи бир юртдошларимиз алдаш йўли билан ўзганинг мулкини қўлга киритиш мақсадида, жиноят йўлига кирган ва ўз нафси йўлида ҳеч нарсадан тап тормайдиган фирибгарларнинг домига тушиб қолишмоқда. Айниқса бу каби жиноятларнинг жамиятимиз гултожи бўлган, биз севиб ардоқлайдиган, доимо эъзоз ва эътиборда бўлган аёлларимиз томонидан содир этилиши жуда ачинарли ҳолат. Давлатимиз томонидан аёлларга ижтимоий-иқтисодий ва ҳуқуқий жиҳатдан кенг имкониятлар берилиши ҳамда жамият ҳаётининг турли соҳаларида фаол иштирок этиши учун барча шарт-шароитлар ва имтиёзлар яратиб берилишига қарамасдан, бу имтиёзларни суистеъмол қилиб, жиноят йўлига кирган аёлларни қандай тушуниш мумкин.
Биз сўз юритмоқчи бўлган қаҳрамонимиз К.П. муқаддам фирибгарлик жиноятини содир қилганлиги учун судланиб, жазони ўташдан муддатидан илгари шартли равишда озод қилинганидан ўзига тегишли хулоса чиқариб олмасдан, фирибгарлик, яъни алдаш йўли билан ўзганинг мулкини қўлга киритиш мақсадида, фуқаро З.Т.ни “Термиз давлат университетига супер контракт асосида ўқишга киритиб, контракт пулларини камайтириб бераман” деб алдаб, З.Т.дан 2020 йил сентябрь ойида Қумқўрғон тумани марказида 400 АҚШ доллари, 2020 йил октябрь ойи бошларида Термиз шаҳрида 200 АҚШ доллари, 2020 йил октябрь ойи охирларида Олтинсой тумани А.Бўтаев маҳалласи ҳудудида 500 АҚШ доллари, жами бўлиб 1.100 АҚШ долларини алдаш йўли билан олиб, ўзининг шахсий эҳтиёжларига ишлатиб, хавфли рецидив жиноятини содир қилган.
Бундан ташқари ушбу жиноят билан чекланиб қолмасдан, ўзининг жиноий ҳаракатларини такроран давом эттириб, фирибгарлик, яъни алдаш йўли билан ўзганинг мулкини қўлга киритиш мақсадида, фуқаро А.Н.ни Термиз давлат университетига сиртқи таълим шаклида супер контракт асосида ўқишга киритиб, контракт пулларини камайтириб бераман” деб алдаб, кўпчилик фуқароларни ўқишга киритганлигини айтиб, унинг ишончига кириб, ундан жами бўлиб 800 АҚШ долларини, фуқаро М.Т.ни “қизингиз А.Бни Тошкент давлат педагогика университетига супер контракт асосида ўқишга киритиб, контракт пулларини камайтириб бераман” деб алдаб, кўпчилик фуқароларни ўқишга киритганлигини айтиб, унинг ишончига кириб ундан 700 АҚШ долларини, фуқаро М.С.ни “ўғлингиз А.Б. ни Тошкент фармацевтика институтига супер контракт асосида ўқишга киритиб, контракт пулларини камайтириб бераман” деб алдаб, кўпчилик фуқароларни ўқишга киритганлигини айтиб, унинг ишончига кириб, М.С. дан 200 АҚШ доллари ва 6.200.000 сўм пулларини, фуқаро А.А.ни “қизингиз М.Шни Термиз давлат университетига супер контракт асосида ўқишга киритиб, контракт пулларини камайтириб бераман” деб алдаб, кўпчилик фуқароларни ўқишга киритганлигини айтиб, унинг ишончига кириб, М.С.дан 1.000 АҚШ долларини, фуқаро С.С.ни “қизингиз А.М.ни Тошкент тиббиёт Академиясига супер контракт асосида ўқишга киритиб, контракт пулларини камайтириб бераман” деб алдаб, кўпчилик фуқароларни ўқишга киритганлигини айтиб, унинг ишончига кириб, С. С.дан 1.500 АҚШ долларини, фуқаро Д.Х.ни “ўғлингиз Т.Т.ни Тошкент давлат иқтисодиёт университетига супер контракт асосида ўқишга киритиб, контракт пулларини камайтириб бераман” деб алдаб, кўпчилик фуқароларни ўқишга киритганлигини айтиб, унинг ишончига кириб, Д.Х.дан 700 АҚШ долларини, фуқаро Б.А.ни “қизингиз К.А.ни Тошкент фармацевтика институтига супер контракт асосида ўқишга киритиб, контракт пулларини камайтириб бераман” деб алдаб, кўпчилик фуқароларни ўқишга киритганлигини айтиб, унинг ишончига кириб, Б.А.дан 1.000 АҚШ долларини алдаш йўли билан олиб, ўзининг шахсий эҳтиёжларига ишлатиб юбориб, такроран, хавфли рецидив жиноятларни содир қилган.
Жиноят ишлари бўйича Олтинсой туман суди К.П.нинг ҳаракатларида жазони енгиллаштирувчи ҳолатлар йўқ деб ҳисоблаб, унинг илгари ҳам қасддан фирибгарлик жиноят содир этиб судланганидан сўнг, қасддан янги жиноят содир этганлигини жазони оғирлаштирувчи ҳолатлар деб ҳисоблаб, унга нисбатан Ўзбекистон Республикаси ЖКнинг 168-моддаси 3-қисми “б” банди билан шу Кодекснинг 57-моддаси қўлланиб, 5 йил 2 ой муддатга озодликдан маҳрум қилиш жазосини тайинлади.
Хулоса ўрнида айтиш мумкинки, суд ҳукми билан бир оила келажаги барбод бўлди, фарзандлар кўчада қолди….
Жиноят ишлари бўйича Олтинсой туман суди раиси Илҳом Абраев
Сурхондарё вилоят судининг жамоатчилик ва ОАВ билан алоқалар бўйича бош консультанти Нилуфар Тўраева
