Муқаддас турмушга чиқиб, бир оилани яхшигина келини бўлиб юрди. Фарзандли ҳам бўлди. Ҳамма ғит-ғитлар турмуш ўртоғи Россияга кетгач бошланди. Аввалига озроқ пул юборди. Сўнгра орадан йил ўтса ҳам бирон сўм юбормай қўйди. Келин ўзича пулни онасига юбораётгандир деган гумон билан қайнонасига ёмон муомала қила бошлади.

Қайнона-келин деярли ҳар куни даҳанаки жанг қилиб олар эди. Ҳатто уларни маҳалла фаоллари ҳам муросага келтириша олмади. Уларни нотинч оилалар рўйхатига киритиб қўйишди.

Бир куни келин болам касал пул керак, ўғлингизга айтинг,- деди. Қайнона ўғлига нима деди бу келин учун қоронғу. Турмуш ўртоғи у томондан телефон қилиб, сўкинди, сенга пул йўқ,-  деди. Хуллас калом эр-хотин телефонни еб қўйгудек бўлиб бақиришиб жанг қилишди. Телефонни заряди ўчди, жанг тўхтади.

Енгини шимариб, келин қайнонаси Ҳанифа опа устига бостириб бориб, ўғлингни чақир, эрлик вазифасини бажарсин, деб қайнона билан уруша кетди. Келин қайнонанинг бўйнига чанг солиб, бўйнидаги тиллозанжирни  узиб олди. Бечора қайнона келин зарбидан ерга йиқилиб, ҳушини йўқотди.

Шифохонага боргач, қўли синганини айтишди. Бечора қайнона анча кун шифохонада ётиб даволаниб чиққач, келинига нисбатан даъвоси борлигини айтди.

Тилига эрк берган келин, оиласини барбод қилди. Шукроналикни тан олмаган келин Муқаддас Орифова ўзи билмаган ҳолда “бургага аччиқ қилиб кийгиз”га ўт қўйди.

Кечирим сўрашни ҳам билмаган Муқаддас Орифовага суд ўз ҳукмини ўқиди.

Жиноят ишлари бўйича Шўрчи туман судининг раиси

Музафар Хакимов

Халқ маслаҳатчиси Чори Қорақулов