Ўзбекистон делегациясининг Лондон шаҳрида бўлиб ўтган «The Global Borrowers & Bond Investors Forum» кўргазмасида иштироки доирасида мамлакатимиз элчихонаси томонидан Буюк Британия Бизнес ва савдо вазирлиги билан ҳамкорликда юртимизнинг инвестициявий ва савдо-иқтисодий салоҳиятига бағишланган бизнес-форум ташкил этилди.

Тадбирда Ўзбекистоннинг «Навоий КМК» АЖ, «Uzbeksteel» АЖ, «Ўзтелеком» АЖ каби саноат корхоналари раҳбарлари, шунингдек, «Алоқа Банк», «Ипак йўли банк», «Агробанк», «Бизнесни ривожлантириш банки» ва бошқалар қатнашди. Британия томонидан эса 50 дан ортиқ компания, банк ва молия институтлари вакиллари иштирок этди.

Ўзбекистон элчиси форумдаги нутқида, Янги Ўзбекистонда иқтисодиётни либераллаштириш соҳасидаги ислоҳотларнинг бориши ва икки томонлама ҳамкорликнинг ижобий динамикаси ҳақида маълумот берди. У ўзаро ҳамкорликни кучайтириш учун фойдаланилмаган салоҳият мавжудлигини таъкидлади. Британия компанияларининг Ўзбекистон билан қайта тикланадиган энергия, тоғ-кон саноати, қишлоқ хўжалиги, банк-молия, таълим ва бошқа соҳаларда ҳамкорлик қилишга қизиқиши ортиб бораётгани қайд этилди.

Буюк Британия Бизнес ва савдо вазирлиги вакиллари бугунги кунда Ўзбекистонда хорижий компаниялар учун кенг имкониятлар очилаётганини таъкидлади. Қайд этилганидек, мамлакатимизда иқтисодиётнинг деярли барча тармоқларида жадал модернизация жараёнлари амалга оширилмоқда. Давлат корхоналарини кенг кўламда хусусийлаштириш бошланди, темир йўл, автомобиль транспорти, аэропортлар қурилиши, «яшил» энергетика каби тармоқларда йирик инфратузилма лойиҳалари ҳаётга тадбиқ этиляпти.

Иштирокчилар, шунингдек, сўнгги йилларда Ўзбекистонда инвестициявий муҳит сезиларли даражада яхшилангани, халқаро компанияларнинг мамлакатда бизнес юритишга қизиқиши ортиб бораётганини таъкидладилар. Шу нуқтаи назардан, бир қатор компаниялар вакиллари куз фаслида Тошкентда ўтказилиши режалаштирилган Ўзбекистон-Британия cавдо ва саноат кенгаши (UBTIC) йиғилиши доирасида бўлиб ўтадиган бизнес-форумда иштирок этиш ниятларини тасдиқлашди.