Гап озиқ-овқат дўкони эгаси Абу Сайиднинг ўлдирилиши ҳақида кетмоқда, деб ёзади Dhaka Tribune

Бангладешнинг собиқ бош вазири Шайх Ҳасинага нисбатан Даккада яшовчи фуқаро томонидан қотиллик иши қўзғатилди. Бу ҳақда Dhaka Tribune нашри хабар берди.

Жанубий Осиё республикасининг собиқ ҳукумат раҳбари 19 июль куни Дакканинг Муҳаммадпур туманида бандлик квотасига қарши намойишлар чоғида отиб ўлдирилган озиқ-овқат дўкони эгаси Абу Сайидни ўлдиришда айбланмоқда. Газетанинг қайд этишича, Сайид полиция томонидан отишма натижасида вафот этган. Дакка судига Муҳаммадпурда истиқомат қилувчи Амир Шатил номидан маҳаллий тадбиркорнинг ўлдирилиши бўйича даъво аризаси берилди.

Ишда Шайх Ҳасинадан ташқари бошқа айбланувчилар ҳукмрон Авами лигаси партияси собиқ бош котиби Обайдул Куадер, собиқ ички ишлар вазири Асадуззамон Хон Камол, полиция собиқ бош инспектори Чоудхури Абдулла Ал Мамун ва бошқа юқори мартабали полиция ходимларидир.

Бангладеш Жиноят кодексига кўра, бу мамлакатда қотиллик энг оғир жазо, жумладан, умрбод қамоқ ёки ўлим жазосини ўз ичига олади.

5 август куни Шайх Ҳасина истеъфога чиқди ва мамлакатни тарк этди. Унга ва унинг ҳукуматига қарши намойишлар июль ойи бошида ишсизлик даражасининг юқорилигидан норози талабаларнинг ишга жойлаштириш квоталари киритилишига қарши чиқишлари билан бошланган. Уларнинг хатти-ҳаракатлари кенг тарқалди ва июль ойи давомида давом этган полиция билан тўқнашувларга айланди. Август ойида давом этган тартибсизликлар натижасида Бангладешнинг турли шаҳарлари кўчаларида 400 дан ортиқ одам ҳалок бўлди.

Ҳозирда республикада Тинчлик учун Нобел мукофоти совриндори Муҳаммад Юнус бошчилигидаги муваққат ҳукумат тузилди. У 8 август куни қасамёд келтирди.