Бир кун уруш бўлган жойдан қирқ кун барака қочади. Бойсун туман деҳқон ва озиқ-овқат бозори билан боғлиқ можародан кейин экскаватор билан қазилган чуқурда иш олиб бораётган фуқаронинг оёғи шикастлангани ҳақида хабар келган эди. Суриштириб бу шахс Бойсун туманидан Термизга олиб келинганини аниқладик. Ҳозиргина Термиз шаҳрида жойлашган Республика шошилинч тиббий ёрдам илмий маркази Сурхондарё филиалидаги манбамиз шикастланган бойсунлик йигит жарроҳлик операциясидан муваффақиятли чиқарилгани ҳақида хабар берди.

Маълум қилинишича, Бойсун туман ободонлаштириш корхонаси ходими 1986-йилда туғилган Холов Озод Ҳамроевич 13-май куни 13:10да мазкур шифохонага қариндошлари томонидан олиб келинган. Ўнг оёғи гипсда бўлган беморга рентген кўригидан сўнг болдир суяклари майдаланиб, ёпиқ синиш ташхиси қўйилган.

Олиб борилган текширув ишларидан сўнг шифокорлар беморда бугун жарроҳлик амалиёти ўтказишди ва суяклар очиқ усулда тўғирланиб, металл конструкция аппаратлари жойлаштирилган ҳамда орқа мия антизияси қўлланилган,  айтилди хабарда. Шифокорлар маълумотига кўра, жарроҳлик амалиётидан сўнг беморнинг аҳволи қониқарли.

Эслатиб ўтамиз, агар Холов Озод Ҳамроевичнинг иш пайтида жароҳатланганлиги ҳужжатларга мувофиқ тасдиқланса унга меҳнат қонунчилиги бўйича меҳнатда майибланганлик компенсацияси тўланиши керак.