Дунёда парранда гриппининг янги штаммидан илк ўлим ҳолати қайд этилди. Бу ҳақда “Корреспондент.нет” манбаси хабар берди.
Манбада айтилишича, мексикалик 59 ёшли эркак парранда гриппининг А(H5Н2) деб номланган янги штаммидан вафот этган. Эркак парранда гриппи белгилари пайдо бўлгунга қадар ҳам бошқа сабабларга кўра оғир хасталикни бошдан кечираётган бўлган.
Жаҳон соғлиқни сақлаш ташкилоти бу воқеа янги штамм туфайли дунёдаги биринчи ўлим ҳолати эканлигини баён қилган. 59 ёшли эркак билан рўй берган ҳолат янги грипп инфекциянинг лаборатория томонидан ҳам тасдиқланган биринчи ҳолатидир.
Қайд этилишича, вафот этган эркакда апрель ойида касаллик белгилари пайдо бўлган. Унинг иситмаси кўтарилган, нафас олиши қийинлашган. Ич кетиши, кўнгил айниши ва умумий летаргия кузатилган.
Симптомлар ошкор бўла бошлаганидан бир неча кун ўтиб бемор шифокорларга мурожаат қилган ва касалхонага ётқизилган. Беморни сақлаб қолишнинг иложи бўлмаган. Касалхонага олиб келинган куннинг ўзида эркак оғир асоратлардан вафот этган.
Олдинроқ Хитойда парранда гриппининг H3N2 ва H10N5 қўшма штаммлари билан касалланган аёл вафот этган эди. 63 ёшли аёлда ёндош касалликлар ҳам бўлгани хабар қилинган.
2022 йилнинг апрелида ҳам парранда гриппининг Ҳ3Н8 штаммидан дунёда биринчи ўлим ҳолати Хитойда қайд этилган. Хенан провинциясида яшовчи тўрт ёшли болакайда товуқлар ва қарғалар таъсиридан кейин иситма ва бошқа аломатлар пайдо бўлган.
