Алкоголь маҳсулотларини ноқонуний айланмасига чек қўйиш борасида ҳуқуқни муҳофаза қилувчи органлар томонидан тизимли чора-тадбирлар амалга оширилмоқда.
Хусусан, Бандихон туманида ўтказилган тадбирда «Бандихон» маҳалласида жойлашган алкоголь маҳсулотларини сотиш учун мўлжалланган савдо дўкони сотувчиси Анвар Бобоев (исм-фапмилия ўзгартирилган) ўзида бўлган қалбаки акциз маркали алкоголь маҳсулотларини бошқа шахсларга ўтказиш орқали фойда топиш мақсадида 2023 йил 18 ноябрь куни ўзининг яшаш хонадонида бўлган тергов давомида аниқлашнинг имкони бўлмаган томчи оқма принтер орқали акциз маркаси қўпайтириб, сотилаётган жами 153 дона 1.0 литр ҳажмли «Необыкновенные глаза» номли алкоголь маҳсулотларини тадбирга жалб қилинган «Х» исмли шахсга 6 миллион сўмга сотаётган вақтида ҳуқуқни муҳофаза қилувчи идоралар тезкор ходимлари томонидан ушланган.
Тезкор тадбир давом эттирилиб, ўзи сотувчи бўлиб ишлаб келаётган алкоголь маҳсулотларини сотиш учун мўлжалланган савдо дўкони кўздан кечирилганда жами 3 турдаги 215 дона алкоголь маҳсулотлари ҳамда 20 қути «ESSE» Chahge номли тамаки маҳсулотлари борлиги аниқланиб, келгусида текширилиб кўришлик учун холислар иштирокида ашёвий далил тариқасида расмийлаштириб олинган.
Сурхондарё вилоят ИИБ Эксперт-криминалистика марказининг экспертиза хулосасида, дўкон сотувчиси Анвар Бобоевдан ашёвий далил сифатида олинган алкаголь маҳсулотларининг ҳар бир туридан бир донадан экспертиза тадқиқоти учун тақдим этилган серия ва рақамли акциз маркалар қалбаки, томчи оқма принтерда тайёрланганлиги қайд этилган.
Аниқланган ушбу ҳолатга кўра дўкон сотувчиси Анвар Бобоевга нисбатан дастлабки тергов органи томонидан Ўзбекистон Республикаси Жиноят кодексининг 176-моддаси 1-қисми билан жиноят иши қўзғатилган.
Жиноят ишлари бўйича Бандихон туман судида ўтказилган очиқ суд мажлисида судланувчи Анвар Бобоев 2 йил муқаддам ўзининг эхтиёжлари учун бир дона томчи оқма рангли принтерни бозордан харид қилиб, ушбу принтерни ўзининг яшаш хонадонида сақлаб келганлигини маълум қилган.
Шунингдек, 2023 йил ёз фаслида қизиқиб ушбу томчи оқма рангли принтердан алкоголь маҳсулотларига тегишли бўлган бир неча акциз маркадан нусха чиқариб кўпайтирган ва ушбу акциз маркаларни ўзида бўлган алкоголь маҳсулотларига ёпиштириб чиқган.
Бундан ташқари, у қалбаки акциз маркали алкоголь маҳсулотларини ўзининг яшаш хонадонида сақлаб келаётган, лекин пул керак бўлганлиги учун харидор сифтида келган шахсга барча қалбаки акциз маркали алкоголь маҳсулотларини сотиб юборган, аммо айнан неча дона тайёрлаганлигини эслолмаслиги, тайёрлаган қалбаки акциз маркаларнинг барчасини ишлатиб юборганлиги, алкоголь маҳсулотларининг акциз маркалари сохта эканлигини олдиндан билганлиги, ҳозирги вақтда содир этган қилмишидан пушаймонлигини билдириб, ўзига енгиллик сўради.
Судда судланувчининг айби ўзининг ва гувоҳларнинг суддаги кўрсатувлари, жиноят ишида мавжуд ҳужжатлар ва экспертиза хулосалари ҳамда тўпланган бошқа далиллар йиғиндиси билан ўз тасдиғини топган.
Жиноят ишлари бўйича Бандихон туман судининг ҳукми билан дўкон сотувчиси Анвар Бобоевга Ўзбекистон Республикаси Жиноят кодексининг 176-моддаси 1-қисми билан озодликни чеклаш жазоси тайинланган.
Хулоса шуки, қонун устувор ва жазо муқаррар.
МУРОТАЛИ АБДИМУМИНОВ, Жиноят ишлари бўйитча Бандихон туман суди раиси
