2023 йилда Қўшма Штатларда қурбонлар билан камида 38 та оммавий отишма содир бўлди, бу 2006 йилдан бери энг кўп. Бу ҳақда “Washington Post” нашри хабар берди. 

Нашр “оммавий қотиллик” атамасини, ҳужумчиларнинг ўзларини ҳисобга олмаганда, тўрт ёки ундан ортиқ одам ўлдирилган воқеаларга нисбатан қўллаган. 2023 йилда бундай эпизодларнинг умумий сони 38 тани ташкил этган бўлса, аввалги рекорд бир йил аввал қайд этилган – ўшанда мамлакатда 36 та оммавий отишма қайд этилган. 

Умуман олганда,  2023 йилда АҚШдаги отишмалар оқибатида камида 197 киши ҳалок бўлган ва 91 киши жароҳатланган. Бундан ташқари, 2006 йилдан бери шунга ўхшаш вазиятларда вафот этганлар сони аллақачон 2423 нафарга этган. 

Нашр таъкидлаганидек, ўқотар қуролдан оммавий отишмалар сони 2019 йилда кўпайган, сўнгра COVID-19 пандемияси даврида бироз камайган, кейин эса ҳаёт нормал ҳолатга қайтиши билан яна кўпайган. Ушбу тенденциянинг сабабларини тушунтирар экан, газета, мутахассисларга таяниб, бу АҚШда ўқотар қуролларга борган сари осон эришиш билан боғлиқ бўлиши мумкинлигини урғулайди.