Исроил Ғарбий Соҳилдаги юқори мартабали ҲАМАС етакчисининг уйини портлатиб юборди. Бу ҳақда Al Jazeera хабар берди.
Рамаллоҳ яқинидаги Арура шаҳрида Солиҳ ал-Арурийнинг уйи бутунлай портлатиб юборилган. Ливанда қувғинда яшаётгани тахмин қилинаётган ал-Арурий ҲАМАС сиёсий бюроси раисининг ўринбосари. Ҳодиса пайти у ва оиласи ҳам уйда бўлмаган.
Исроил кучлари 10 кун олдин ал-Арурийнинг уйини эгаллаб олган ва ундан разведка маркази сифатида фойдаланишни бошлаган.
“Бу уйни портлатиш кўпроқ рамзий маънога эга эди. Исроил разведкаси ал-Арурийни қўлга олишни хоҳлайди. У 7 октябрь куни ҲАМАС Исроилга уюштирган ҳужумнинг ҳақиқий ташкилотчиларидан бири сифатида қаралади”, — деди Al Jazeera мухбири.
Исроил, шунингдек, 1400 исроилликнинг ўлимига сабаб бўлган 7 октябрь ҳужумларини уюштиришга алоқадор бўлган ҲАМАСнинг яна бир аъзосини ўлдирганини эълон қилган.
