Тожикистонлик 27 ёшли Рустам Набий 47 нафар ўзбекистонликни Швецияга ноқонуний олиб ўтгани учун қамоқ жазосига ҳукм қилинди. Бу ҳақда “Swedinfo” хабар берди.
Полиция Рустамнинг ўтган йил август-ноябрь ойлари орасида камида 12 та Stena Line ва Landskrona паром рейсларида Ўзбекистондан Швецияга камида 47 нафар ноқонуний муҳожирни олиб ўтганини исботлаган.
Рустам Набийнинг асл касби рассом бўлиб, рафиқаси ва болалари билан узоқ вақт Польшада яшаган. Бироқ у ноқонуний муҳожирларни Швецияга олиб ўтиб, қўшимча пул ишлашга қарор қилган.
Полиция сўроқлари чоғида ҳибсга олинган ноқонуний муҳожирлар Швецияга нима учун келгани ҳақида гапириб берган. Улардан бири у шунчаки сайёҳ эканини ва Норвегияга саёҳат учун кетаётганини айтган.
Бошқалар эса Туркия, Сербия, Чехия, Испания ва бошқа бир қанча давлатлар орқали ўтиб, ниҳоят Рустамнинг ёрдами билан Швецияга етиб келганини айтган.
Туман суди ҳам, апелляция суди ҳам тўпланган далиллар Рустам Набийни айбдор сифатида баҳолаш учун етарли, деб ҳисоблаган. Рустамнинг ўзи жиноятни инкор этиб, ноқонуний иш қилганини тушунмагани, фақат ёрдам беришни хоҳлаганини айтган. У ҳибсга олинган куниёқ мижозлар билан мулоқотда бўлган мобил телефонидан Telegram’ни ўчириб ташлаган.
Швециянинг чет элликлар тўғрисидаги қонунига кўра, одамларни контрабанда қилиш ўз-ўзидан жиноий жавобгарликка тортилмайди. Бундай фаолият билан шуғулланадиган ҳар бир киши, масалан, сиёсий фаоллик, оилавий ёки ахлоқий сабабларга кўра, жазодан қутула олади. Лекин бундай хизматлар учун ҳақ олган шахс жиноий жавобгарликка тортилиши мумкин.
Бу ҳолатда ҳам судлар Рустамнинг катта миқдордаги пул эвазига одам олиб ўтиш билан шуғулланганини аниқлаган. Гап унинг банк ҳисобварағидан ўтган, бир неча ўн минглаб швед кроналарига тўғри келадиган кўплаб операциялар ҳақида бормоқда.
Блекинге туман судида Рустам Набий 2 йил қамоқ жазосига ҳукм қилиниб, 10 йилга депортация қилинган. Рустам ҳукм устидан апелляция судига оқланиш умидида шикоят қилган, бироқ бунинг ўрнига яна 6 ой муддатга қамоқ ва қўшимча равишда умрбод депортацияга ҳукм қилинган.
