«UzAuto Motors» фуқароларнинг олдиндан пулини олиб, «Captiva 5» автомобилини етказиб беришни ваъда берганди. Бироқ турли бахоналар билан ваъдасини бажармай, истеъмолчиларга «Captiva 5»ни етказиб бера олмаслигини эълон қилди ва қисман компенсация эвазига пулларини қайтариб берди, айримлари бошқа автомобиль олишди.

Компаниянинг истеъмолчиларни оёқ ости қилиши биринчи марта эмас ва бунга кўпчилик хафсаласиз кўз юмиб қўя қолган.

Бироқ компаниянинг бундай «ўйин»ларига кўз юммаганлар ҳам бор. Улар олдиндан пулини олиб, «Captiva 5»ни бермаган компаниянинг фирибгарона ўйинларига рози эмас.

Ўз ўрнида Истеъмолчилар агентлиги уларнинг мурожаатини ўрганиб, фуқаронинг ҳуқуқларини ҳимоя қилиш керак, деган қарорга келди ва Ў.Қаххаровнинг манфаатларини ҳимоя қилиб, «UzAuto Motors»  АЖга қарашли «Авторум» МЧЖни фуқаролик ишлари бўйича Қарши туманлараро судига берган.

Даъвода асосий жавобгар «Авторум» МЧЖ, қўшимча жавобгар   «UzAuto Motors»  АЖ.

Суддан жавобгарлар зиммасига фуқаро Ў.Қаххаров билан тузилган шартнома бўйича «Captiva 5» автомашинасини фуқарога етказиб бериш мажбуриятини юклаш, ҳар бир кечиктирилган кун учун 0,01 фоиз пеня ундириш сўралган.

Дастлабки суд шу йилнинг 5 август куни бўлиши керак эди, лекин жавобгар келмагани учун суд қолдирилган. Навбатдаги суд 17 август соат 15.30га тайинланган.