Чехиянинг Прага шаҳрида швейцарча тизимда ўтказилган халқаро турнирда 8 та давлатнинг 10 нафар гроссмейстери қатори ҳамюртимиз, рапид йўналиши бўйича энг ёш Жаҳон чемпиони Нодирбек Абдусатторов ҳам ғолиблик учун дона сурди.
8-турдан кейин Нодирбек 5,5 очко жамғарган ҳолда пешқадамлар сафидан жой олиб турганди. Ҳал қилувчи 9-турда у словакиялик Пехас Жергус билан дуранг ўйнади. Бу натижа ўз навбатида германиялик Винсент Кеймер ҳамда америкалик Ханс Ниеманн фойдасига ишлади. Улар ўз рақиблари устидан ғалабага эришган ҳолда Абдусатторовни 0,5 очкога ортда қолдиришди.
Якуний натижаларга кўра, Кеймар 6,5 очко билан мусобақа ғолиблигини қўлга киритган бўлса, Ханс Ниеманн қўшимча коэффициентларга кўра, 2-ўринни эгаллади. 9 имкониятдан 6 очко жамғарган Нодирбек эса халқаро турнирни 3-ўрин билан якунлади, дея хабар тарқатди Спортни ривожлантириш вазирлиги матбуот хизмати.
