Жамиятимизга ўзбекистонлик Санамой опадан қўнғироқ бўлди. У онасининг ўлимидан кейин ўгай отаси унга уйланмоқчи бўлганини эшитиб, уйидан қочиб кетган 17 ёшли қизчага соҳиб чиқишганини  айтди.

“Бу қизчани қизғандик. Ёмон йўлларга адашиб кетмаслиги, ёмон одамларнинг қўлига тушиб, хор бўлмаслигини хоҳладик. Биз у қизчани тўлиқ ҳимоямизга олишга тайёрмиз. Аммо вояга етмагани, ҳужжат масаласида муаммолари борлигини ҳисобга олиб, сиздан ёрдам сўраймиз”, – деди у. 

Маълум бўлишича, қизимизнинг онаси (1977 йилда туғилган) 2020 йилда Туркия фуқаросига турмушга чиқади. Жорий йилнинг июнь ойида у қизини ўқишга киритиш учун Туркияга чақириб олади. Бироқ тақдир тақозосига кўра, онаси 8 сентябрь куни кутилмаганда вафот этади ва Истанбул шаҳридаги кимсасизлар қабристонига дафн этилади. 

Онаси вафотидан кўп ўтмай туриб ўгай отаси қизимизнинг қариндошларига қўнғироқ қилиб, унга уйланмоқчи эканини айтади. Улар ҳам бунга рози бўлишади, негадир. 

Бу гап-сўзлардан хабар топган қизимиз тахминан тонгги 04:00лар атрофида уйдан қочиб чиқади ва онаси ишлаган текстил фабрикасига боради. У ерда ўзбекистонлик аёллар қизчага эга чиқиб, унга уй-жой ва меҳр бериб келмоқда. 

Айни пайтда Ўзбекистоннинг Истанбулдаги Бош консулхонаси ва “Елкадош” жамияти билан биргаликда қизимизни қариндошларининг васийлигига топшириш учун уни Ўзбекистонга жўнатиш устида иш олиб бормоқдамиз. Жумладан, ҳомийлар қизимизни Ватанимизга қайтариш харажатларини зиммаларига олган бўлса, Ўзбекистондаги тегишли ташкилотлар уни кутиб олиб, қариндошларининг қўлига топширади ва келажакда ўз ўрнини топиши учун барча керакли ёрдамларни кўрсатади. 

Озода Исломова,

“Ўзбек аёллари ҳуқуқлари” жамияти раҳбари