Россия Федерацияси Федерал хавфсизлик хизмати (ФХХ) ходимлари Москва, Екатеринбург ва Омск шаҳарларида “Крокус Сити Ҳолл”даги терактга алоқадорликда гумон қилинган уч нафар шахсни қўлга олди. Бу ҳақда Россия ФХХнинг Жамоатчилик билан алоқалар маркази хабар берди.
“Россия Федерацияси Федерал хавфсизлик хизмати Москва, Екатеринбург, Омск шаҳарларида 2024 йил 22 март куни “Крокус Сити Ҳолл”да содир этилган терактга алоқадор бўлган Россия фуқароси ва икки чет эл фуқароси – барчаси Марказий Осиё минтақасидан келган муҳожирларни қўлга олди”, дейилади хабарда.
Қайд этилишича, олиб борилган тезкор-қидирув тадбирлари давомида қўлга олинганлардан икки нафари террорчилик ҳаракатида фойдаланилган ўқотар қурол ва автомашиналарни сотиб олиш учун пул ўтказгани, учинчиси террорчилик хуружига шерикларни ёллаш ва унинг ижрочиларини молиялаштириш билан бевосита шуғуллангани аниқланган.
Маълумот учун, 22 март куни Москва вилоятидаги “Крокус Сити Ҳолл”нинг концерт залида бир гуруҳ қуролланган шахслар отишма бошлаган, кейин эса ўт қўйган. ИШИДнинг «Вилоят Хуросон» номли ячейкаси ҳужум учун жавобгарликни ўз зиммасига олди. Россия расмийлари теракт ортида Украина турганини даъво қилмоқда. ФХХ терактга алоқадорликда гумон қилинган 11 кишини қўлга олганини маълум қилди. Аввалроқ ўн киши ҳибсга олингани, жумладан, тўрт нафари бевосита жиноятчилар бўлгани ҳақида хабар берилган эди. ФХХ 31 март куни Доғистонда теракт тайёрлашда гумон қилинган тўрт нафар хорижликни қўлга олгани ҳақида хабар берди. Ҳибсга олинганлардан бири теракт иштирокчиларига қурол ва пул берганини айтди.
