Хитой ҳукумати мамлакатда вазнни назорат қилиш ва соғлом турмуш тарзи учун қулай муҳит яратиш чораларини кўради. Мақсад – айрим одамлар гуруҳларида ғайритабиий вазн билан боғлиқ вазиятни яхшилаш

Миллий соғлиқни сақлаш комиссияси, Таълим вазирлиги ва Хитой Халқ Республикаси Фуқаролик бошқаруви вазирлиги вазн назоратини кучайтириш учун уч йиллик кампания бошланганини эълон қилди. Дастур Хитойнинг 16 та идора ва ташкилотлари томонидан биргаликда тайёрланиб, 26 июнь куни Давлат қўмитаси сайтида эълон қилинди, деб хабар беради «Sinxua» ахборот агентлиги.

Акция доирасида Хитойда аҳоли вазнини назорат қилиш учун қулай муҳит яратиш, фуқароларнинг тана массаси индексини назорат қилиш усуллари ҳақида хабардорлигини ошириш, шунингдек, соғлом турмуш тарзини кенг жорий этишга қаратилган қатор чора-тадбирлар амалга оширилади.  Мақсад – айрим одамлар гуруҳларида ғайритабиий вазн билан боғлиқ вазиятни яхшилаш.

Ҳужжат иш берувчиларни ходимларнинг жисмоний машқлар билан шуғулланиши учун инфратузилмани таъминлашга рағбатлантиришга чақиради. Талабалар шаҳарчаси ҳудудида туз, шакар ва ёғ миқдори кўп бўлган маҳсулотлар сотилишига йўл қўймасдан, соғлом озиқ-овқат билан таъминланган ошхона ва ресторанлар ташкил этиш таклиф этилмоқда. Шунингдек, ўқувчиларнинг жисмоний ҳолатини яхшилаш бўйича чора-тадбирлар режасини амалга ошириш, шу жумладан, мактабда ҳам, мактабдан кейин ҳам ҳар куни камида бир соат жисмоний фаолликни таъминлашга қаратилган ҳаракатларни амалга ошириш тавсия этилади.

Ҳужжатда кампанияда анъанавий Хитой табобатидан фойдаланиш муҳимлиги ҳам таъкидланган.

Соғлом истеъмолнинг янги концепциясини тарғиб қилиш, озиқ-овқат элементларига кўпроқ эътибор қаратиш учун озиқ-овқат маҳсулотларини қайта ишлаш технологияларини модернизация қилиш бўйича саъй-ҳаракатларни кучайтириш, қайта ишланган озиқ-овқатларда ўсимлик мойи, туз ва шакар миқдорини оқилона камайтириш зарур.

Айниқса, ҳомиладор аёллар, чақалоқлар, болалар ва ёш талабалар, қариялар ва айрим касб эгалари каби гуруҳларда аҳоли вазнини янада аниқроқ назорат қилиш тавсия этилади.

Оғирлик даражаси одамлар саломатлиги билан чамбарчас боғлиқ, деб ишонилади ва анормал вазн, айниқса, ортиқча вазн ва семизлик сурункали касалликлар, жумладан, юрак-қон томир касалликлари, диабет ва саратоннинг айрим турларини ривожланишида асосий омил ҳисобланади. Хитойнинг Миллий соғлиқни сақлаш комиссияси баёнотида, вазнни назорат қилишнинг асосий мақсадларидан бири бу касалликларнинг олдини олиш ва назорат қилиш ва касалликларни даволашдан кўра одамларни соғлом сақлашга эътибор бериш эканлигини таъкидлади.

Оғирлиги паст ва тўйиб овқатланмайдиган одамлар ҳам вазнни назорат қилиш ҳаракатларига қўшилиши керак, дейилади баёнотда.