Россия Буюк Британияга қарши жавоб санкцияларини кенгайтирди. Бу ҳақда бугун, 27 сентябрь куни Россия Ташқи ишлар вазирлиги маълум қилди.
Россиянинг “қора рўйхати”га 23 киши, жумладан Британия ҳарбий-сиёсий тузилмаси, журналистлар корпуси ва илмий ҳамжамият вакиллари киритилди.
“Россия Федерациясига кириши тақиқланган Британия фуқаролари рўйхатига Британия ҳудудида Украина қуролли кучлари жангчиларини тайёрлашни назорат қилувчи Британия Қуролли Кучлари мудофаа штаби бошлиғи Э.Радакин, Лондоннинг Украина йўналишидаги стратегиясини шакллантиришда иштирок этган Буюк Британия ҳукумати ҳузуридаги Қўшма разведка қўмитаси раиси М.Алессандри, шунингдек, Британиянинг BAE Systems мудофаа компанияси директорлар кенгаши раиси К. Хогг киритилди”, дейилади хабарда.
Билдирилишича, Британия томонининг Россияга нисбатан санкциялар босимини оширишга уринишига Москва муқаррар равишда кескин жавоб қайтаради.
“Лондоннинг душманлик ҳаракатларига жавобан Россия “стоп-лист”ни кенгайтиришда давом этади”, дея хулоса қилган ТИВ.
Маълумот учун, Россиянинг Украинада босқини бошланганидан кейин АҚШ, Буюк Британия, Канада ва бошқа давлатлар Россияга қарши санкциялар жорий қила бошлаган. Хусусан, Лондон охирги марта санкциялар рўйхатини жорий йилнинг 7 сентябрида кенгайтирган. Ўшанда 11 киши “қора рўйхат”га қўшилган. Буюк Британия Ғазначилиги маълумотларига кўра, уларнинг барчаси COVID-19 пандемияси давридаги муҳим инфратузилма ва шифохоналарга қилинган бузғунчиликлар ортидаги Россия кибержиноятчилар гуруҳининг аъзолари бўлган. Айни пайтда Буюк Британиянинг санкциялар рўйхатидан Россия Маданият вазири Ольга Любимова, Таълим вазири Сергей Кравцов, журналист Антон Красовский ва бошқалар жой олган.
